الطريق الي كندا

كل ما تريد معرفته


    انت جاى كندا لية ؟

    شاطر

    monte.real

    عدد المساهمات : 34
    تاريخ التسجيل : 02/03/2010

    انت جاى كندا لية ؟

    مُساهمة  monte.real في الثلاثاء مارس 02, 2010 11:53 am

    بسم الله الرحمن الرحيم الحمدلله والصلاة والسلام على رسول الله وعلى آله وصحبه أجمعين

    سألت نفسى كثيرا عن الاسباب التى دفعت البعض الى الهجرة الى كندا ؟ طبعا اجابة السؤال ليست كالاجابة التى حفظناها من اجل المقابلة -- ولكن كل منا لدية اسبابة الخاصة التى دفعتة الى الهجرة
    اولا : وضع مادى افضل
    حيث ان الكثير منا يعمل فى مصر فى وظائف ضعيفة العائد المادى
    ثانيا : عدالة اجتماعية
    الكثير منا ايضا يعمل فى وظائف مرموقة ولدية عائد مرتفع ويحتاج فقط الى العدالة الاجتماعية الغائبة عن مصر
    ثالثا : الخروج من استعباد الخليج
    هناك عدد ليس بالقليل من المتقدمين متقدمين من دول الخليج ( مصريين طبعا ) عرفوا اخيرا ان نظام العبودية انتهى فى دول اخرى

    ما سبق كان الحالة قبل الهجرة -- اما بعدها تكون النتائج كالتالى

    عمل لاندينج والعودة مرة اخرى خصوصا العاملين بالخليج ( عدد كبير منهم )
    او العمل حتى الحصول على الباسبور والجنسية والعودة مرة اخرى
    او او الاستمرار فى كندا لان الذهاب من الاصل كان هجرة مش سفر

    استغرب كثيرا عندما اسمع عن السؤال عن اعلى الاماكن دخلا -- او اكثر المدن طلبا للعمالة
    طيب هو انت بتفكر لية اكنك رايح الخليج عايز تغرف فلوس وتربط الحزام وتعيش 3 فى الاوضة وتحول الفلوس الى البلد علشان يشتروا ارض (فيلم طيور الظلام )

    وفى ناس بتتكلم تحس من كلامها انها عايزة تعمل فلوس كتير وبعد عشر سنين ترجع بقى بالخميرة كلها

    وكل ما سبق مش عارفين ان الدخل فى كندا اغلبة متقارب بسبب نظام الضرائب وان الدخل
    تستطيع دفع ايجارك وسداد كل احتياجاتك وركوب سيارة كويسة وتعيش عيشة محترمة وتعلم اولادك كويس اما لو فاكر ان كندا هى السعودية او الامارات رايح تغرف فلوس وتحول ت بقى واهم --الكل على المنتديات ان كندا للعيشة والخليج للفلوس وعليك ان تختار

    ايضا ما الفارق بين ان تعمل مثلا صيدليا فى تورونتو ب 4000 دولار وبين ان تعمل فى كالجارى ب 5000 دولار -- وجهة نظرى ان الفارق ليس كبيرا لكى تغير المدينة تشد الرحال انت واسرتك الى مدينة اخرى -- اعتقد من وجهة نظرى المتواضعة ان الفرد الذى يترك عملة وينتقل الى عمل اخر من اجل 500 دولار او يترك مدينتة الى مدينة اخرى من اجل 1000 دولار لن ينجح فى حياتة نظرا لولائة الشديد للمال

    كنت جالسا الصيف الماضى مع احد الكيبيكوا -- قال لى انه مندهش من قلق المصريين على رزقهم -- واندهش ايضا من تعودهم على الحياة تحت كل هذا الضغط

    وقال ان الحياة فى كيبيك مختلفة تماما

    وللحديث بقية

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:55 am

    اعتقد ان المهاجر الناجح هو الذى خطط جيدا لهجرتة وعارف هو ح يعمل اية ؟ وح يشتغل اية ؟ وح يسكن فين ؟ وعندة خطط بديلة تحسبا لاى ظرف طارق -- وانا استخدمت هذا الاسلوب عند زيارتى الى دمشق ونجحت نجاح باهر -- فاهتمامك بالتفاصيل الصغيرة هو سر نجاح الامور الكبيرة

    اتمنى ان تكون خطط المهاجرين -- ان يكون مواطن كندى ناجح وعضو جيد فى الجالية وناجح فى عملة -- ومثل مشرف لنفسة ودينة وجاليتة واصحابة --

    واحد صاحبى عمل فى مطعم فى امريكا لمجرد ان هناك كبير الطباخين مصرى ومثال مشرف داخل المطعم -- فارادوا ان يكون هناك اتنين من المصريين الممتازيين داخل مطعمهم

    عملك الجيد ليس لك وحدك ولكن للاخرين ايضا

    مبدئك الاساسى فى الهجرة هو الاستمتاع بالحياة وليس الفلوس -- هم هناك كذلك -- الاستمتاع بالحياة فى المقام الاول

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:56 am

    صاحبى المصرى الكيبيكاوى اللى قابلتة فى الصيف الماضى -- قال لى ان نظام الضرائب هناك هدفة هو تقريب الدخول من بعضها لعدم ظهور فوارق بين الطبقات ( زى عندنا طبعا )
    وقال ان دخلة السنوى 100000 دولار بياخدوا حوالى 45000 ضرائب -- والذى دخلة 50000
    بياخدوا ضرائب حوالى 15000 اذن الفارق بين الاتنين بعد الضرائب 20000 فقط وليس 50000 قبل الضرائب

    قالى ايضا انة فى مونتريال عندما يذهب الى مطعم يترك مفاتيح سيارتة داخل السيارة لانة لا يوجد حرامية -- لماذا يسرق ؟ لا يوجد اسباب لذلك

    كذلك فمن الممكن فى المطعم ان يكون الوايتر لدية سيارة غالية اكثر منك وهو الذى يقوم بخدمتك انت الذى من الممكن ان تكون جاى فى المترو -- و دة فايدة نظام الضرائب

    اما صاحبى الكيبيكاوى الاصل -- عندة 45 سنة و كان يمارس رياضة هوكى الجليد وهو ايضا قائد فى فريق للكشافة -- ويذهب الى التخييم دائما -- حيث انة مقيم فى مدينة جرانبى ( مدينة صغيرة شرق مونتريال )

    الكل هناك اجمع على الاستمتاع بحياتة -- ياريت المهاجرين الجدد يعرفون هذا -- بدلا من بحثهم الدائم عن الضغط العصبى والوظيفة والمعادلة

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:56 am

    عندما جلست مع صاحبى الكيبيكاوى -- استغرقت الجلسة ثلاث ساعات -- ثلاث ساعات بيتكلم بمستوى صوت واحد -- لا يوجد انفعال او انخفاض للصوت -- مستوى صوت واحد فقط --

    هدوء و نقاء لا تجدها كثيرا --نظرا لضغط الحياة --

    من الملاحظ ايضا كم الاستفادة من اللقاء 3 ساعات من الكلام المفيد -- لا مجال من المهاترات الجانبية -- لا تعليق على الجالسين او الكلام فى موضوع تافه --

    الملاحظ ايضا -- عندما جلسنا كنت قد طلبت منه معلومات تفصيلية عن معادلة المحاسبين فى كيبيك -- وعند عودتة فوجئت من كم الايميلات العارضة للمساعدة اينعم لم احصل على معلومات فى النهاية نظرا لانهم مش فى نفس المجال -- لكن يكفى روح المساعدة من ناس باكستان وسعوديين ومصريين -- وانا لا اعرفهم

    الملاحظ ان انا الذى اعيش فى دولة اسلامية بدات الايميلات ب دير فلان -- اما هم العايشين فى دولة علمانية ( كندا ) بدئوا الايميلات ب السلام عليكم

    ومن خلال تعاملى مع الناس دى سواء مهاجرين او ناتيف -- الناس دى من الصعب يجيلها ضغط او سكر -- لانا بتتعامل مع الحياة من منظور تانى غيرنا

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:57 am

    بالأمس فقط بدأت افكر عمليا فى موضوع الهجرة لكيبيك ، بعد تردد و بعد الوصول لقناعة بأن هذه الخطوة هى الخطوة الصحيحة قررت فعليا أن أستعد للهجرة ، محتاج 4 أو 5 سنين علشان أكون مستعد لكل شئ من حيث اللغة و الخبرة و تحديد تخصص الماجستير المناسب ثم الحصول عليه ، ياريت الظروف تيجى فى صالح القرار ده و ما تتعقدش كالعادة . .

    عندما فكرت فى الهجرة الى كندا 2004-- ذهبت الى المحامى اياة -- فى القاهرة
    ولكن كلامة معجبنيش -- حسيت انة ح ياخد الفلوس ولن يقدم مساعدات مقابل هذا المبلغ الكبير من المال الذى من الصعب المغامرة به فى ذلك الوقت -- وانا غير متزوج كمان

    وعند مرور السنين وتاجيل الحلم -- انشغلت انا بالزواج -- و بدا اصحابى مشوار الهجرة
    بدون محامى -- وعندها بدا الحلم يراودنى من جديد -- خصوصا بعد تحسن الاحوال المادية والقدرة على المغامرة بمبلغ من المال -- بالاضافة الى الزواج ووضع المتزوج الافضل

    بدات المشوار : عند توافر المال + الوقت المناسب +معرفة معلوماتية صحيحة ( مهمة جدا )

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:59 am

    قرر احد اصحابى فى مونتريال الاسبوع الماضى تقليل علاقتة بالمصريين المقيمين هناك ولا ادرى -- ما هى الاسباب التى دفعته الى اتخاذ هذا القرار - لكنه الان منضم الى اصحابة فى الكورس الفرنسى -- و هؤلاء من الصين وفينزويلا واوكرانيا و بيرو و البرازيل -- هل نعتقد ان معاملة هؤلاء افضل من معاملة المصريين -- لا اعلم ؟

    شىء غريب عندما نكون مثل شيىء بالخارج ؟
    عندما وصل صاحبى هذا الى مونتريال فى مايو الماضى -- احاط نفسة بالجالية تماما -- فارسلت له عتابا انه يجب ان يمارس اللغة الفرنسية مع الكيبيكوا -- ويترك المصريين جانبا
    ولم يسمع الكلام -- فتركتة لشؤونة

    وبعد هذة الفترة -- قرر هو ما اردتة وطلبتة من 6 شهور -- يا ترى ما هى الاسباب والدوافع التى جعلتة يقوم بذلك -- لا اعلم !!!!!!!!!!!!!!!!!!!!

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 11:59 am

    لماذا نحن ذو وجهين وهم ذوى وجهة واد فقط ؟
    حتى المصريين هناك ذو وجهة واحد فقط -- اذن السبب هى البيئة التى نعيشها -- هى التى جعلتنا نعيش بوجوة عدة

    عندما بدات مشوار الهجرة فى بداية هذا العام -- اتعرفت على ناس كتيييير وافكار اكتر
    اتعرفت على ناس سعادتها فى تقديم المساعدة -- واتعرفت على ناس تحوم و تشمشم على المعلومات وتاخدها وتحطها فى بير غويط حتى لو شافت حد محتاج تعمل نفسها مش واخدة بالها -- حاجة غريبة

    واحد اعرفة بيلوم واحد صاحبى على انة بيقدم معلومات كتير عن الهجرة و عايز ناس كتير تهاجر -- بيقولة متعملش كدة علشان الموضوع ميلمش وتفقد الميزة انك مهاجر والباقى مصريين -- طبعا كلام مريض -- ينم على مهاجر سيكون فاشل فشل زريع -- عمر ربنا مع ح يقف مع حد بهذا التفكير المريض حتى لو نجح ح يكون نجاح لحظى فقط

    و اتعرفت على ناس كيفها وسعادتها انها تساعد بعض -- بيدوا فلوس لبعض علشان يعملوا شهادات البنك -- ونصائح متبادلة لاكمال الملف بالشكل الصحيح

    فعلا تجد ان الله قد خلق الخير والشر ليحقق التوازن

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:00 pm

    دعونا لا ننسى مبدانا الاساسى -- هدف هذا التوبيك -- اجعل هدفك من الهجرة هو الاستمتاع بالحياة وان تكون مواطن جيد ومثال يحتذى به ومثل مشرف لابناء وطنك بالخارج

    رفعت القبعة لاحد اصحابى المقيمين فى امريكا لانة ترك مجال قيادة سيارات اللموزين ( الاسترتش ) وتفرغ لتدريب الكاراتية --كاراتية

    كاراتية اية يا عم الحاج -- يا ولة خاف على نفسك لا تضرب ولا تاخدلك شلوت -- المهم انه وجد نفسة ملكة ممارسة وتدريب الكاراتية -- وطبعا هو مش فى طالة ام جلمبو فى الشارع اللى ورا -- دا فى صالة رقم 3 على العالم فى الكاراتية -- فى نيو يورك

    عرف بعد 8 سنوات فى امريكا معنى الاستمتاع بالحياة -- اعمل ما تحب كى تحب حياتك -- كم من اصاحبنا يعملون فى وظائف وهم يكرهونها كثيرا ويتمنون اليوم الذى يتركون هذة الاعمال ولكن ما باليد حيلة

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:02 pm

    دعونا لا ننسى مبدانا الاساسى -- هدف هذا التوبيك -- اجعل هدفك من الهجرة هو الاستمتاع بالحياة وان تكون مواطن جيد ومثال يحتذى به ومثل مشرف لابناء وطنك بالخارج

    ممكن سؤال عمومي حول الفقرة أعلاه..
    ليه ما بيخطرش ببالنا/ ليه ما بنفكرش نجعل هدفنا هو الاستمتاع بالحياة وأن تكون مواطن جيد ومثل يحتذى به ومثل مشرف لأبناء وطنك (ولنفسك) بالداخل؟
    هي تفريعة صغننة كده بس جوه الموضوع ومن باب مناقشة الأفكار المطروحة فيه.

    فليه.. ليه نفكر نعمل الكلام ده بره مش جوه؟
    بصرف النظر عن الصعوبات والمشاكل والإحباطات وسيرة كل سيرة سلبية.. هو السؤال ليه وإن كان ولابد ليه ما بنفكرش في كده رغم الصعوبات والمشاكل والعوامل المحبطة؟
    اعتقد من الصعب جدا عمل هذا بالداخل لعدم وجود البيئة التى تتيح عمل هذا -- كيف تستمتع بالحياة وسط كل هذة المنغصات -- كيف تكون مثلا يحتذى به وسط انعدام الاخلاقيات -- هل ستكون الملاك وسط الغيلان -- هل ستكون ورقة بيضاء وسط بركة من السواد -- تركنا بلدنا لان الحمائم لا تعيش مع الذئاب -- وقانون الغابة غير صالح مع الجميع -- البعض يصلح لان يتحول الى ذئب والاخرين -- مقتنعين انهم بنى ادمين مش حيوانات -- والبقاء للاقوى -- قانون الغابة للحيوانات فقط

    و قد صرفنا الكثير من اموالنا -- كتصريح سفر للخروج من الغابة -- والحياة ك بنى ادمين

    بل وعلى العكس ان كثير من المهاجرين خارجين من البلد وفى قلوبهم سكين طعنها احد الوحوش الكاسرة فى الغابة التى نحياها -- وللامثلة كثيرة

    فمثلا صديقى اللى فى مونتريال ترك البلد على الرغم من عدم اقتناعة من الاصل بموضوع الهجرة -- لكن بعد تعرضة للظلم اكثر من ثلاث مرات فى موضوع الدراسات العليا فى كلية الطب -- و هو موضوع مكرر كثيرا -- الدراسات العليا مخصصى فقط لابناء الاساتذة -- والطلبة حتى الان غير مصدقين هذا الكلام -- وبعد ان تم عضة ثلاث مرات من وحوش الغابة - قرر الخروج منها لانة انسان مش حيوان -- وانه لا يحب قانون البقاء للاقوى مش الاصلح

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:03 pm

    المشاركة الأصلية كتبت بواسطة Sepia
    عندي فقط اضافة صغيرة في موضوع المال أم الإستمتاع بالحياة , أظن أن الإختيار بينهما ليس بهذه البساطة, و أظن أن في بعض الأحيان قد يتم حسم الأمر مبدئيا في صالح الإستمتاع بالحياة بسبب صعوية الحلم بالمال في بداية الهجرة. لكن مهم أن نكون واقعيين اكثر و الواقع يقول أن بعد فترة من الهجرة و محاولة الإستقرار و بعد أن يتعود المرء على ممارسة الأدمية المفقودة في بلادنا , يبدأ يتطبع رويدا رويدا بطباع أهل البلد الأصليين - بعد أن يكون كون حصيلة معارف من الكنديين االمستقرين من جيلين أو ثلاثة هنا - و من كثر معاشرتهم يجد نفسه بدأ يركض في نفس السباق معهم, لأنه إن لم يفعل سيجد نفسه دائما محكوم عليه بإحساس المهاجر المستجد المشاهد من المدرجات في الدرجة الثالثة.
    و أول مرحلة في هذا السباق كمواطن كندي , هو أن يكون لديك منزل. لا يسكن في بيوت الإيجار هنا من أهل كندا سوى الشباب أو الأسرة المغتربة من مقاطعة إلى مقاطعة على أن تكون تمتلك بيت في المقاطعة الأصلية,, و ثمن أي بيت لا يقل عن 300 ألف دولار كندي فأعلى,, طبعا هناك قروض بنكية لإمتلاك البيوت و لكنها في النهاية "قروض" و لابد من سدادها... الخلاصة أنه شاء أم أبى يدخل المهاجر بعد فترة في مرحلة هاجس تجميع المال سواء سيدفع كاش (و هو مستحيل ) أم سيقسط و ذلك حتى يتمم أول مرحلة في السباق كمواطن كندي ..
    و بعد تمام هذه المرحلة الأولى ,,تتوالى مراحل السباق.

    الكلام دة عاجبنى جدا جدا

    100 100 والله

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:05 pm

    الطموح هو اهم حاجة -- عايز توصل لاية

    امكانياتك دى مش بأيدك ربنا ادالك نصيبك من الاماكنيات -- وعليك استخدام هذة الامكانيات مع طموح كبير -- للوصول الى مستوى عالى من الرفاهية والعمل

    المهم يكون عندك الامل والطموح -- واهم حاجة ان تكون ابيض من جوة -- مش معناها انك تكون مش عارف حاجة -- لا معناها انك تحب الخير لنفسك ولغيرك و زى ما فى ناس ساعدتك من غير ما تطلب منها او لما طلبت منها -- يبقى لازم تساعد الناس سواء طلبت منك او ما طلبتش

    و عن تجربة من خلال مشوارى فى موضوع الهجرة ( سنة واحدة بس ) -- فى ناس بتاخد معلومات وتستفيد وبس -- وفى ناس بتدى معلومات وتساعد الناس وتحصل ايضا على مساعدات فى نفس الوقت

    و لأنى من الصنف التانى فقد اصبح عندى معارف كتير وشبكة علاقات متشعبة -- و اتعرفت على ناس من هنا وهناك -- الحمد لله

    لاقيت ناس مش عايزة حد يعرف بموضوع الهجرة دا غيرهم --مش حابين حد يهاجر معاهم او بعديهم -- وناس عارفة معلومات كتير وتسال ايضا عن معلومات لكن تعالى بقى اسالهم عن معلومة يعملوا عمو العبيط

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:06 pm

    بدا حلم السفر من زماااااااااااااااااان و لكن كنت كالاعمى مش عارف اية الطريق او مين اللى يشجع او مين اللى عملها علشان نعرف الطريق

    اول الاحلاك كام الحلم الامريكى زى كل الشباب الجامعى -- عملت الباسبور و دفعت الرسوم وخدت الاقفا زى كل الشباب المصرى اللى ضيع فلوسة على الحلم الامريكى -- طيب ما هما مش غلطانين ما هو حلم مش حقيقة انتوا اللى صدقتوا بقى

    وبعدها اتجة الحلم الى كندا -- و ذهبنا الى المحامى اياة -- وكلامة و الفلوس اللى طلبها خلت الموضوع شبة مستحيل -- واتاجل الحلم الكندى

    ودخلت فى معترك الحياة و تزوجت --و بعد الزواج لاقيت ان مجموعة من شركاء الحلم بدءوا مشوار الهجرة

    قلت اخيرا ممكن ابدا المشوار -- و ذلك للاسباب التالية -- المتزوج وضعة افضل فى موضوع الهجرة - وجود مبلغ من المال يمكن وضعة فى مشوار زى كدة -- التقديم بدون محامى وبدون الالاف من الجنيهات على الفاضى

    وبدات المشوار

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:07 pm

    توضيح للفارق ما بين اللازم واللى يفضل فى موضوع الهجرة

    فى كثير من مشاركات المنتديات نجد ان هناك مشاركة عن جزئية معينة ويتكلم العضو ان لازم نعمل كذا -- زى مثلا لازم نجيب شهادة من سنتر الفرنساوى -- او شهادة بنك جديدة فى المقابلة -- او ختم الخارجية على اوراق ملف الفيدرال -- هو طبعا يفضل مش لازم

    يعنى لازم : تجيب شهادة خبرة جديدة قبل المقابلة بكام يوم -- لازم يكون معاك اصول كل ورقك مش الورق اللى مطلوب بس فى جواب المقابلة لازم تعرف تفاصيل معادلتك هناك ومهام شغلك هنا

    و يفضل : شهادة بنك جديدة -- شهادة من السنتر الفرنساوى -- شهادة دلف -- توثيق من الخارجية -- شهادة ميلاد لازوغلى --

    و المفروض اللى يقول لازم يجيب الدليل من موقع الهجرة الرسمى غير كدة يبقى يفضل -- دا كمان على موقع الهجرة بيقولك فى ملف الفيدرال لازم شهادة ميلاد لازوغلى -- و فى ناس بعتوا شهادة ميلاد العادية بالكمبيوتر -- وسافروا عادى

    يبقى نتعلم لما نتكلم نوضح الفارق بين ما هو لازم وما هو يفضل -- علشان نسهل الموضوع على المقدمين الجداد

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:11 pm

    اللى رايح مونتريال يعمل حسابة

    طبعا زى ما كلنا عارفين ان الجزائر بتتكلم فرنساوى احسن من اللى خلفونا -- وان اذا وصل 100 من الجزائر الى مونتريال و 100 من مصر

    بعد سنة تلاقى اللى فضل من الجزائريين 90 ومن المصريين 40 بس يعنى بمعنى اصح الجزائريين اكتر من المصريين هناك -- وانا شفت بعد الماتش مسيرات للجزائريين فى شوارع مونتريال -- بس العلاقة هناك كويسة اجبار مش اختيار

    الجزائريين دمروا الدنيا فى بلجيكا وفرنسا واسبانيا وعلى الرغم من عددهم الكبير فى كيبيك الا محدش يقدر يعمل حاجة خارجة عن القانون لية؟؟؟؟؟؟؟؟؟؟؟

    لان اى حاجة خارجة عن القانون يعنى سجن وغرامة مالهاش اول من اخر -- فى ناس فى مصر بتقولى خلى بالك دول كتير هناك فى مونتريال -- قلتلهم طب ياريت حد منهم يجى جنبى ولا يرمينى حتى بطوبة -- علشان ارفع علية قضية تعويض و اخرب بيتة -- وارفع على الحكومة الكندية قضية تعويض لانها موفرتليش الامن الكافى دا انا من ادفعى الضرايب -- و اخد الفلوس دى واعيش لحد اخر السنة بلطجة

    انا كنت بعمل شات مع واحد جزائرى فى مونتريال -- بيقولى هو مش بيحب الكورة و دول ناس مجانين ملهوش دعوة بيهم

    و كل صحابى المصريين فى مونتريال -- قال اية يا خويا عاملين حملة دفاع عن الجزائريين لان كل صحابهم الجزائريين محترمين

    و ربنا يهدى

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:15 pm

    لازم نعدل تفكيرنا

    اول امس جلس بعض من شلة كيبيك مع صاحبنا الدكتور القادم من كالجارى طبعا هو هربان من برد كالجارى وقالك شتا اسكندرية ارحم

    المهم صاحبنا حكى ان معادلة الطب مكلفة جدا -- فكان علية ان يعمل اى عمل اخر و يجمع مبلغ المعادلة -- وبالفعل عمل لمدة سنتين فى اعمال كاجول -- وعمل المعادلة -- وهو الان طبيب ناجح فى كالجارى

    هناك ثلاثة انواع من المهاجرين :

    1- يرفض العمل فى اى عمل كاجوال -- ويبدا المعادلة و يحصل على قرض للدراسة تغطى مصاريفة و يعمل بعد المعادلة فى تخصصة

    2- يعمل عمل كاجوال حتى انهاء المعادلة -- لانة عايز يشتغل لممارسة اللغة وفهم الدنيا هناك او اذا كانت المعادلة مكلفة

    3- يعمل عمل كاجوال وينسى ان هناك معادلة ويغرق فى اعمال الكاجوال


    يا ترى ح تكون مين فى دول ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:17 pm

    صاحبنا كالجارى مان قالنا ان الفرنساوى مهم حتى لو ح تسيب كيبيك -- لانك لو ح تشتغل فى كالجارى او فانكوفر ومعاك فرنساوى ح يكون فرصك احسن فى الشغل

    و بعدين كورسات الفرنساوى فى كيبيك ببلاش عايز اية اكتر من كدة

    وعلى راى مسيو جان شارية : جوة و برة فرشتلك وحالك مايل واية يعدلك

    يبقى ناوى على كيبيك لازم يكون معاك فرنساوى ناوى على غير كيبيك برضة يفضل يكون معاك فرنساوى

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:18 pm

    كان لينا زميل . كان هايحط ليك حل رابع ربنا يمسيه بالخير بقى انت ماحضرتوش
    الحل الرابع ان كيبك بلد الانتخه والى جاي جاي علشان الاعانه

    بالنسبة لموضوع الاعانة دا
    انا عرفت ان اللى يقدم على الموضوع دة -- ينسى كلمة قرض بعد كدة وكلمة فيزا
    و موقفة ح يبقى صعب لما يحب يشتغل -- لانة خلاص اتسجل فى على انة ( شحات )

    اتسجل فى تاريجة انة بلطج لفترة من الفترات -- دلوقتى اتغير وعايز يبقى من قوى الشعب العاملة صعب

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:19 pm

    نسبة كبيرة من الناس تعمل لاندينج وترجع

    انا مش عارف السبب -- والتفاصيل اللى خليتهم يعملوا كدة -- يعنى اية عيلة اربعة او خمسة افراد -- تروح مونتريال تقعد 20 يوم و ترجع تانى -- طيب تذاكر الطيران والفندق والتنقلات يتكلف كام -- حوالى 35000 مستريح -- طيب بترجع تانى لية ؟

    اكيد هناك اسباب و اسباب مختلفة من حالة للتانية و جزء منها مقنع وجزء تانى لا

    انا مش عارف الاسباب دى --اللى يعرف سبب او مقتنع بالموضوع دة يقول

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:21 pm

    طيب انا بقول مونتريال لية :

    عد غنماتك يا جحا

    تورونتو : على جثتى -- دا لما يكون الفيزا ببلاش -- و الوظيفة مستنيانى كمان -- يوقلك لا غرب احسن الشرق لا -- عدى الشارع تبقى فى امان لو عديت النحية التانية تبقى فى خطر -- قبل يانج اة بعد يانج لا -- بالذمة دا كلام منطقى على مدينة ح نعيش فيها باقى عمرنا -- هل ستجبر اولادك على عدم التواجد بعد هذا الشارع ولا الداون تاون؟ طبعا لا
    بالاضافة الى وجود تقارير عن زيادة معدلات الجريمة مؤخرا -- يبقى الواحد خرج سليم من مصر واتسرق فى كندا -- يا شماتة ابلة طاظا فيا -- يبقى باى باى تورونتو


    كالجارى -ادمنتون : ماشى شغل كويس -- بس مدن صغيرة و مافيش اوبشن كتير -- بالاضافى الى الشتاء الجميل -- اية يعنى 50 تحت الصفر يا راجل هى دى درجات حرارة -- دا كلام فارغ عادى ابقى خدلك بلوفر زيادة ولا حاجة -- صاحبى فى كالجارى بيقول ( هارب من برد كالجارى و قاعد فى اسكندرية ) بيقول انة يتم اضافة مادة على البنزين حتى لا يتجمد -- كذلك يتم وضع السيارة بالليل فى فيشة كهربا و ذلك حتى لا يتجمد زيت الموتور -- يبقى ان شاء الله انت بقى ح تحط نفسك على انهى فيشة قبل ما دمك يتجمد فى عروقك -- طيب افرض انك نسيت تحط الفيشة بالليل -- صحيت الصبح و دورت العربية يبقى الموتور علية العوض
    -- يبقى باى باى البرتا كلها

    فانكوفر : دى بقى ممكن -- محدش يقدر يتكلم نص كلمة عن الشقيقة العزيزة فانكو -- بس بعيد -- لية تسكن قريب لما ممكن تسكن بعيييييييييييييييييييييييييييييييييد

    يبقى مافيش قدامك غير وطنك الام يا جمعة -- مونتريال -- مونتريال

    طيب بالذمة -- انا اذممك بالذمامة -- فى مدينة فيها جبل فى النص -- فيها 3 انهار -- فيها 3 خطوط مترو -- 300 كيلو عن نيويورك -- 230 كيلو عن كيبيك سيتى -- 200 كيلو عن نياجرا


    بعد كل دة لسة بتفكر

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:23 pm

    بصراحة يامونتريال موضوعك جميل جداً وكل واحد تقريباً حدد هدفه من البداية وربنا يوفق الجميع
    لكن انا ظروفي تختلف عن ظروفكم جميعاً فأنا مهاجرة لكندا مضطرة وانا اخترت الفيدرال - ادمنتون
    موضوعك هو انت جاي لكندا ليه ؟ وانا حرد ، واتمنى انه ردي مايحبط معنوياتكم فكل واحد وظروفه واتمنى الخير للجميع .

    اول مرة حكتب عن بعض اموري الشخصية لأني اؤمن بالحكمة التي تقول ( لاتشكو للناس جرحاً انت صاحبه لايؤلم الجرح الا من به المُ)

    في الاول انا عراقية مقيمة في ليبيا (جينا لليبيا في عام 2002 وكنا ناويين ان نبقى 3-4 سنوات لكن الظروف حكمت علينا وبقينا المدة هذي كلها ). متزوجة وعندي 3 اطفال عمري في الثلاثينات وزوجي في الاربعينات، طبعا انتو فهمتوا الحكاية من كوني عراقية ، بس بصراحة انا لا ارغب في العيش غير بس في العراق ، عودتي للعراق حاليا مرهونة في ان نلاقي عمل هناك، انا وزوجي نعمل اساتذة جامعة انا عندي ماجستير وزوجي عنده دكتوراه ، عايشين في ليبيا من تسع سنوات مضت نريد ان نرجع لكن مفيش وظائف ، رغم ان زوجي له اكتشافات نفطية هائلة في العراق والان بدأوا يستثمروها وللاسف مكتشفها عايش برا ومش لاقي شغل في بلده.

    طبعا كندا لايختلف عليها اثنين من ناحية التعليم واكيد حتقولولي انه لو كنتوا في كندا وزوجك اكتشف هذي الابار النفطية كان عيشتوا احسن عيشة ، الكلام هذا صحيح ومش مختلفة معاكم ، لكن كلما انظر للمستقبل البعيد وتربية اولادي احس بالمسؤلية تجاههم ، الحمد لله انا ربيتهم احسن تربية وبتوفيق من الله لايعرفوا يكذبوا لا انانيين لايؤذون احد، بيصلوا دايما وصادقين في كل شيء رغم ان اعمارهم مابين العشر سنوات والثلاثة سنوات، لكن اللي مخوفني هو الاندماج في المجتمع الكندي بالنسبة لأولادي ، افتكر لما كنا في اعمار ال12 وفوق كنا بنتسابق انا وصديقاتي على قراءة القران وحفظ بعض اياته وقراءة الكتب الدينية ومناقشتها لما نجتمع ، طيب اولادنا حيلاقوا كتب دينية علشان يقرأوها؟ وحيتنافسوا مع مين ؟ وحيصادقوا مين؟ طيب ابني الصغير عمره ثلاث سنوات اذا رحنا لكندا ان شاء الله وحيدخل المدرسة مش حيتعلم اللغة العربية لغة القران طيب حيقراه ازاي؟ افتكر من سنتين لما رحت لاسطنبول لاقاربنا هناك التقينا بجارتهم سالتنا بوقتها ، انتوا بتعرفوا العربي؟ قلنا لها نعم قالت وبتعرفوا تقروا عربي؟ قلنا نعم قالت يعني تعرفوا تقروا القران بطلاقة؟ قلنا نعم قالت هنيالكم ( يعني يابختكم) بوقتها حسيت بالنعمة اللي احنا فيها وهي نعمة لغة القران.
    اللي بحس بيه هو انه اي طفل من اطفالي لو اخطأ واحنا هناك حنكون احنا المسؤولين لانه احنا السبب في الهجرة ، ومش بس اولادنا ، يمكن اولادنا نالوا حضاً بالعيش في الدول الاسلامية لكن انا بنظر لبعيد ، لاحفادنا كلهم بأعناقنا واحنا اللي حننسأل عنهم يوم القيامة .

    اخي مونتريال انت قلت كلام جميل بانه لازم الواحد يحط خطة وخطة بديلة وبديلة اخرى ، انا بالنسبة لية حطيت خطة اولية وهي اني اروح لكندا ان شاء الله لكن ابقى مرتبطة بالبحث عن عمل في العراق فلو الله رزقنا بعمل في الجامعة راح نترك كندا ونرجع ومش مشكلة الجنسية نقدر كل سنة نروح شهرين او ثلاثة لحد ماتنجمع ثلاث سنوات وناخذ الجواز (وفايدة الجنسية حتكون لأولادنا لما يكبروا يقدروا يدرسوا في جامعات كندا وانا اروح معاهم مش لوحدهم)، والخطة البديلة اذا مالقيت وظيفة في بلدي اتحمل ابقى في كندا لثلاث سنوات لحد ما اخذ الجواز وادرس الدكتوراه واروح لدولة مجاورة مثل سوريا او تركيا ( محبش اعيش في الخليج) واشتغل في الدولة المجاورة بالشهادة اللي راح احصل عليها من كندا ان شاء الله ، ممكن ابحث عن عمل في اي شركة كندية او امريكية او جامعة امريكية والغاية من الدولة المجاورة هو اني ابقى على اتصال بالدولة الام ( على فكرة انا اقدر احصل على الجنسية التركية لانه ابي كانت جنسيته السابقة تركية ولي اعمام في تركيا فمن الممكن ان احصل عليها واعيش في تركيا كمواطنة عادية لكن زوجي وأولادي يبقون عراقيين).
    اما الخطة البديلة الاخرى فهي اذا ماحصلت شي من الخطة الاولى والثانية فأني سوف اضطر في البقاء في كندا وادعوا الله العافية.

    انا اسمع عن الكنديين انهم غير اجتماعيين وحياتهم كلها عملية ويفتقرون الى العواطف والروح الطيبة السمحة لايعملون شيئاً لأحد لله وانما حياتهم كلها عملية واقارن بحياتنا هنا او في العراق ومع اهلنا وزياراتنا لاصحابنا ليست لمصلحة او لعمل وانما للتواصل بينهم ، ومفيش زي الاهل لو فقدناهم .

    ان الله يقول في كتابه العزيز (واذ استسقى موسى لقومه فقلنا اضرب بعصاك الحجر فانفجرت منه اثنتا عشرة عينا قد علم كل اُناسٍ مشربهم كلوا واشربوا من رزق الله ولاتعثوا في الارض مفسدين (60) واذ قلتم ياموسى لن نصبر على طعامٍ واحدٍ فادع لنا ربك يُخرج لنا مما تنبت الأرض من بقلها وقثائها وفومها وعدسها وبصلها قال أتستبدلون الذي هو أدنى بالذي هو خير اهبطوا مصراً فان لكم ماسألتم وضربت عليهم الذلة والمسكنة وباءو بغضبٍ من الله بأنهم كانوا يكفرون بأيات الله ويقتلون النبيين بغير الحق ذلك بما عصوا وكانوا يعتدون(61))البقرة ، انا بشوف انه الاية هذي بتحكي عن اصحاب موسى لم يرضوا بما رزقهم الله في بلدهم فطلبوا المزيد فقال لهم موسى اهبطوا مصرا اي هاجروا وضربت عليهم الذلة ، فانا خايفة انه الاية هذي تنطبق علينا ومايصيبنا من هجرة كندا سوى غضب الله لانه مارضينا بالعيش في دولنا . وهي كندا والا امريكا والا اي دولة هي في الاخر دنيا واحنا جينا في الدنيا هذي لكي نزرع للاخرة .

    اسفة اذا كنت طولت عليكم بالكلام

    الاستاذة مهاجرة

    1- اطلب من حضرتك عدم التفكير فى العودة الى العراق مرة اخرى فى الوقت الحالى حتى لو توفر الشغل فى العراق -- لان حضرتك عارفة الحوادث الكبيرة التى تمر بها العراق

    2- مين قال ان كندا مافيهاش مدارس عربية او اسلامية -- حضرتك بس اللى مدورتيش كويس -- خشى على توبيك مدام سيبيا بتاع ادمنتون -كالجارى -- واقرية ح تلاقى ليناك مدارس عربية واسلامية فى البرتا و لو ملقتيش -- ابعتيلها رسالة على الخاص او على التوبيك

    3- من الصعب ان تنفذى فكرة مرواح كندا كل شهرين او تلاتة -- علشان المصاريف والمسافة وارتباطات الشغل فى البرتا

    4- ح اقول ل حضرتك حكاية -- سنة 94 كان فى واحدة و جوزها عايشين فى اسكندرية وبعدين شغل جوزها انتقل الى الغردقة ( على البحر الاحمر ) -- قعدت تعيط ورافضة فكرة الذهاب الى هناك -- وذهبت بالفعل و بعد خمس سنوات كل لما ترجع اسكندرية تكون مخنوئة و مش عارفة تعيش من الزحمة والناس كتير والتلوث والعربيات الكتير وتبقى عايزة ترجع الغردقة تانى -- سبحان مغير الاحوال -- طيب دا انتى من كام سنة كنتى بتعيطى علشان ما تروحيش هناك دلوقتى الحسابات اتغيرت 180 درجة -- فهمتى

    5- مين قال ان تركيا ح تبقى اامن على الاولاد من كندا -- هو حضرتك ما بتتفرجيش على مسلسلات تركى ولا اية -- الرك على التربية فى الاول و فى الاخر

    6- فى عائلة مصرية هاجرت مونتريال سنة 97 الابن كان عندة حوالى 14 سنة والاب رجع الخليج لانة رفض عمل المعادلة وهو عمل الهجرة علشان الاولاد بس -- يبقى كمان الاولاد من غير اب فى كندا -- الولد اتخرج الان و هو مهندس ناجح -- و ذهب ال السعودية عارفة لية علشان يحج -- ابوة اللى فى الخليج معملهاش -- اذن الرك على التربية و الاخلاق -- وبعدين كندا مش الانحلال الاخلاقى للدرجة دى احنا مش فى امريكا

    7- من الافضل نفسيا للاولاد انهم يحسوا ان ليهم وطن مش زى العرب الرحالة بلا مستقر -- من العراق الى ليبيا الى كندا الى تركيا الى............. الى ...........

    8 - انا متاكد انة لما تروحى كندا ح تغيرى رايك و ح تستقرى هناك

    ارجو ان اكون قد قدمت مساعدة و لو بسيطة

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:25 pm

    فى مشوار الهجرة قابلت ناس كتير واتعلمت كتير -- و بقيت اعمل حسابى فى حاجات اكتر
    يعنى فى مواقف سلبية لناس مهاجرين -- و دايما بحب اتكلم عن السلبيات قبل الايجابيات علشان نتعظ :

    1- واحد عايز يعقد زميلة فى الهجرة بيقولة ان الملف فى مرحلة الفيدرال بياخد حوالى 18 شهر -- طيب انت فاكر انت الدنيا مغلقة والواحد مش ح يعرف يجيب المعلومة الصح -- وساعتها ح تطلع انت الوحش المعقد -- وفى الاول والاخر استفدت اية لما تقول كدة ؟

    2- واحد تانى بيتفرج على مسلسلات عربى كتير -- بيستخدم طريقة اصل فى واحدة صاحبتى يا بابا اتجوزت زميلها عرفى تعمل اية ( وتطلع هى المتجوزة عرفى )
    يقولك هو اية اللى المفروض يتعمل لو الواحد اتجوز بعد الانترفيو -- لكن مايقولش ان هو اللى ح يتجوز -- يقولك هو اية اخبار الشغل فى فانكوفر -- اصل واحد صاحبى بيفكر يروح
    و هكذا -- عامل زى الرجل الغامض اللى يعرف كل حاجة عن كل الناس -- وانت ما تعرفش حاجة عنة

    3- واحد عايز يهاجر لكن مش عايز يطلع مليم من جيبة -- للاسف لسة معملوش الهجرة المجانى -- رغم قدرتة المادية -- الا انة بخيل جدا جدا -- لدرجة انها ممكن تهدم ملف هجرتة من كتر بخلة -- قاعد على الكمبيوتر وعايز الناس صحابنا فى مونتريال تروح تجيب المعلومات عن المعادلة والسكن والعمل والاجور وهكذا -- لكن انا ادور واتعب على المعلومة لا -- اروح اخد دروس وادفع فلوس لية طيب ما تجيب كتابك اصورة -- واذاكر مع نفسى وكل لما تعرف معلومة تعالى قولى مجانا

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:26 pm

    اختلفنا كثيرا فى موضوع اجراءات الهجرة واننى حبيت اوضح بعض الامور من واقع سايت الهجرة على النت لعلها تفيد المهاجرين الجدد :

    -- ترجمة الفيش والتشبية اجبارى مش اختيارى :
    If the original certificate is neither in English nor in French, submit both the certificate and the original copy of a translation prepared by an accredited translator with your application.

    -- مرحلة الفيدرال ( الفيزا ) بعد مقابلة كيبيك تكون للكشف الامنى والطبى فقط -- لا يوجد مقابلة اخرى --و غير مطلوب شهادة لغة

    This is the second and final stage. Here, you will have to pass a medical examination, security and criminal checks. CIC conducts these checks for all immigrants, wherever they intend to move in Canada. You can find more information on both of these topics in
    the I Need To… section on the right-hand side of this page

    -- الفيش من البلاد الاخرى -- اذا اقمت بها 6 شهور فاكثر اذا كان عمرك اكبر من 18 :

    These ********s are to be provided for each country other than Canada, in which you have lived for six consecutive months or longer since reaching the age of 18

    monte.real

    عدد المساهمات : 34
    تاريخ التسجيل : 02/03/2010

    رد: انت جاى كندا لية ؟

    مُساهمة  monte.real في الثلاثاء مارس 02, 2010 12:30 pm

    هى الناس تجربتها بتفشل لية ؟
    لان فى ناس بتقلد اصحابها وخلاص هم قدمواهجرة يبقى انا اقدم انا كمان -- مع انه مافيش ادنى مقومات الهجرة والعيش فى بلاد الغربة او القدرة على التصرف فى المواقف الصعبة اللى احتمالتها كبيرة فى ظل حياة جديدة -- فى ناس معندهاش المعرفة بالبحث عن المعلومة على النت
    ولا تعرف طريقة الوصول للمعلومة -- وتكون النتيجة هى فشل عملية الهجرة --نتيجة عدم القدرة على التوافق مع المجتمع الجديد --او ظهور كم كبير من المعلومات الجديدة عند وصولهم كندا ( طبعا لندرة المعلومات المتاحة لديهم ) -- فى ناس حتى الان لا تعرف ان هناك منتديات للهجرة او مدرسين متخصصين فى الاعداد للمقابلة

    أمثلة :
    -- واحد داخل السفارة مخضوض بيقول انتوا بعتولى اعمل كشف طبى -- لية هو انتوا اكتشفتوا ان عندى اية ؟
    -- واحد تانى بيدفع 490 دولار بتوع اللاندنج -- دفعهم وبيسأل اعمل اية تانى ؟ الست جاوبت سأل تانى واعمل اية بعد كدة ؟ الست جاوبت راح سأل تالت أعمل اية بعد كدة ؟

    -- انت رايح فين فى كندا ؟ فى اونتاريو -- ايوة يعنى فين فى كندا ؟ فى اونتاريو -- طب فين فى اونتاريوا ؟ لا لا انا ح اشتغل فى اونتاريو ( طبعا الباشا فاكر ان اونتاريو دى مدينة )

    هل كل الناس بعد فترة سلوكها بيبقى زى الكنديين ؟

    من خلال الناس اللى عرفناهم طوال السنة اللى فاتت -- فى ناس كتير اكتسبت مهارات و طباع الكنديين -- انا قعدت مع واحد مصرى فى مونتريال من 10 سنين -- قعد يتكلم 3 ساعات بمستوى صوت واحد -- لا ينفعل ف يعلى صوتة ولا يوطى صوتة -- وهدوء شديد -- ولا يوجد خوف من المستقبل -- وتجد حب شديد لتقديم المساعدة ( اوعى تنسى مدام اجازة )

    لكن للاسف الشديد فى ناس لسة عندها الطبع المصرى -- والنعرة اللى على الفاضى -- وقلة الاصل اللى دايما فضحانا فى كل دول العالم حتى الخليج -- حتى الواحد يستغرب من --ازاى واحد زى دة بيتعامل مع الكنديين هو بوشين بقى ولا اية ؟ -- وطبعا الواحد لا يحزن عندما تجد ناس لا تعرفهم ويقدمون لك المساعدة وكل ما لديهم من معلومات للمساعدة وفى نفس الوقت تجد ان مصرى زيك عامل نفسة مش واخد بالة منك -- ف انا لا احزن على ذلك -- لاننا عارفين الموضوع دة مش جديدة

    واعتقد ان مداخلتى فى موضوع اتعلمت اية من مشوار الهجرة -- هى مداخة مختلفة تماما عن اى مداخلة -- ولها معانى كبيرة وكثيرة وكل كلمة فيها بتعنى اشخاص موجودة فعلا

      الوقت/التاريخ الآن هو الأحد ديسمبر 04, 2016 7:26 pm