الطريق الي كندا

كل ما تريد معرفته

    قصتي مع كندا, تجربة شخصية

    شاطر

    Dr.H

    عدد المساهمات: 112
    تاريخ التسجيل: 11/02/2010

    قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:11 pm

    حابدأ الحكاية من الأول خالص كما طلب مني " من طأ طأ لسلام عليكم "

    لحد سنة ٢٠٠٣ لو حد قالي اني حاهاجر بره مصر كنت قولتله مستحيل .....

    ٢٠٠٣ أخدت الدكتوراه و عشت تجربة مرض حمايا الله يرحمه مع مرض السرطان لحد ما توفاه الله ..... بهدلة ما بعدها بهدلة إن الواحد يعيي في مصر ...علما بانه كان دكتور و أنا و المدام دكاترة و أعضاء هيئة تدريس في جامعة القاهرة و بنشتغل في المستشفيات اللي أتعالج فيها و بندفع فلوس كاش ... ما فيش أحسن من كده يعني.... بس المهازل اللي الواحد شافها ملهاش آخر.....

    ٢٠٠٤ رحت رحلة لاوروبا رجعت بعدها بعين ناقدة بقت تجننني ....بقيت اركز قوي في الطابور المعووج و المرور البايظ و البيئة الملوثة و الفساد المستشري و انهيار القيم إلخ كمان الشغل بقى فيه حاجات مش راضي عنها بس مش قادر أعمل فيها حاجة لحد ما ضغط دمي علي فعليا و ضربات قلبي بقت غير منتظمة ....روحت لدكتورة في عين شمس بعد ما سألتني عن نمط حياتي (شغل من غير مواعيد ٧ أيام في الأسبوع منهم أيام ٢٤ ساعة في ال-٢٤ ساعة ) قالتلي لا تغير أسلوب حياتك لا تموت (أبويا الله يرحمه كان دكتور برضه و مات في الخمسين بالقلب)

    في نفس الاسبوع كنت باقرأ في كتاب الله زاي عادتي على قد ما ربنا يقدر قريت الآية ديه و بعدها قررت أسافر أشوف فرصة تانية

    " إِنَّ الَّذِينَ تَوَفَّاهُمُ الْمَلائِكَةُ ظَالِمِي أَنفُسِهِمْ قَالُواْ فِيمَ كُنتُمْ قَالُواْ كُنَّا مُسْتَضْعَفِينَ فِي الأَرْضِ قَالُواْ أَلَمْ تَكُنْ أَرْضُ اللَّهِ وَاسِعَةً فَتُهَاجِرُواْ فِيهَا فَأُولَئِكَ مَأْوَاهُمْ جَهَنَّمُ وَسَاءَتْ مَصِيرًا " ... النساء ٩٧

    ابتديت أدور على فرص السفر ما بين زملائي اللي سافروا قبل كده و عن طريق النت و قدمت طلب هجرة في السفارة الكندية في نفس الوقت

    القصة ابتدت ب-google ....دخلت Toronto + Fellowship و ابتديت أقدم على الوظيفة ....بعت يمكن ل ٦ أو ٧ مستشفيات واحدة بس اللي ردت ..... بعد حوالي سنة في نفس الوقت جالي ٣ فرص سفر ...كندا و انجلترا و السعودية ....أنا كنت مقرر اني ما أسافرش دولة عربية و اني أسافر دولة متقدمة اكمل فيها دراستي .....لازم طبعا تكون بتتكلم انجليزي مع استبعاد أمريكا و أستراليا .... فاضلت ما بين عرضين كندا و انجلترا و اخترت كندا ....ربنا كان ميسرها قوي ....أنا و المدام لقينا شغل و سكن من على النت

    بس حصلت مشكلة مع السفارة الكندية كادت تنسف الموضوع من أساسه

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:13 pm

    حل مشكلة السفاره جه من كندا .... مكتب ال PGME في جامعة تورنتو اتصل بالسفارة و خلص الموضوع .... و الحكاية خلصت على خير ... قرروا انهم يسرعوا طلب الهجرة و جيت كندا في يونيو ٢٠٠٥ كمهاجر و أنا و المدام لينا عقد عمل من أول يوليو ك Fellows في مستشفيتين في تورونتو

    و توالت الصدمات بعد كده .... أول سنة ديه كنت بافكر أسيب كل حاجة و أرجع مصر تقريبا كل يوم

    أول صدمة كانت الحرارة ... أنا كنت فاكر إن الطيارة نزلت غلط في المكسيك من كتر ما الدنيا حر و رطوبة ... التصور إن كندا بلد برد .... تورنتو بالذات صيفها حر فعلا

    تاني صدمة كانت الطوابير على ظابط الجوازات مطار بيرسون أصلا مش مبهر خالص و كبير قوي على الفاضي و بعد رحلة غاية في الأرهاق (KLM بعد ترانزيت في أمستردام ) ما كانتش ناقصة طبور طوييييييل كده

    ظابط الجوازات كان محترم جدا بس ظابط الهجرة كان مشكلة ... الأخ من أصل هندي و لكنته تقيلة جدا و ما كنتش فاهم منه كلمة .... بعد جهد جهيد و سؤال مضحك منه (اذا كنت ما بتفهمش انجليزي ممكن أكلمك فرنساوي ...و طبعا الفرنساوي بتاعه أصلا أضيع من الأنجليزي ) الموضوع خلص و لقيت نفسي في الشارع بادور على تاكسي و ديه كمان صدمة .... التاكسي ليه نظام و دور و أماكن محددة و لو معاكم شنط كتير ذي أي مصري أصيل يبقى لازم فان ....طبعا على واحد لسه جاي من عاصمة السبهللة كان الموضوع بالنسبة لي في غاية التعقيد
    و من صدمة إلي صدمة .... الفندق اللي حجزت فيه على النت طلع في ال-Boys Village و طلع إن ٢٠٠٥ ده العيد ال-٢٥ و لا الخمسين و لا هباب الطين بتاع استعراض مثلي الجنس ال-Pride parade ... و ناس جاية من أنحاء العالم كله علشان يشاركوا و يساندوا اقرانهم في كندا
    طبعا مناظر ما أنزل الله بها من سلطان و أشكال يندي لها الجبين و أنا و المدام نازلين في قلب الأحداث ....احنا قولنا ما لناش عيش في البلد ديه و لازم نرجع .... بعد تفكير عقلاني اكتشفنا إن المجتمع ده من قيمه تقبل الاخر مهما كان و الحرية الشخصية ما دامت لم تتعدي على المصلحة العامة و التسامح مع الآخر .... ده كله حيضمن لينا شخصيا العيش في كندا من غير ما حد يتعرض لينا و لا لديانتنا و لا معتقداتنا و لا عاداتنا

    الصدمة التالية بقي كانت الشغل

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:14 pm

    لقيت شقة كويسة جدا جنب المستشفيات ... ١٠ دقايق مشي للمستشفي بتاعتي و ١٠ دقايق مشي لمستشفي المدام ... الشقة كنت طلبتها بمواصفات معينة من سمسار برضه عن طريق النت ... جابلي ٤ شقق فيهم كل اللي أن طالبه و اداني معاد في تورنتو اختار واحدة منهم (كل ده خلص في مصر على النت قبل ما أجي )

    رحت أقابل رئيسي المباشر في الشغل و هو من أصل برازيلي و ساعدني جدا و لحد النهارده افضاله علي ... الراجل قعد المقابلة كلها يحذر في من اللي حيحصلي و من ناس معينة و من الفترة الاولي الأختبارية اللي ممكن تنتهي على انهم ينهوا عقدي لو ما أثبتش اني على المستوى المطلوب ( الفترة ديه بتقعد حوالي ٣ شهور و بتبقى فتره عصيبة جدا لانك كل يوم تحت أشراف و ملاحظة و اللي بيراقبك بيبقى "breathing down your neck" ذي ما بيقولوا

    خلصت المقابلة مع الدكتور البرازيلي و رجعت البيت و أنا هايب الموقف ... طبعا أول كام أسبوع ده لا كان فيه تلفزيون و لا نت و لا تليفون ... لا فاهمين نظام المواصلات و لا ألاكل و لا التسوق .....أصعب وقت فعلا

    ابتديت الشغل ....أنا أصلا مدرس في جامعة القاهرة و ياما اشتغلت في مستشفيات في مصر لكن تورونتو كأني شغال في سفينة فضاء كل حاجة مختلفة و غريبة و عايزة ميت سؤال و أنا المفروض في فترة اختبار و علي العين ..فيه ناس كانت كويسة و متفهمة و فيه ناس ما تفهملهاش و ناس شرانية .... زاي أي مكان في الدنيا .... أقرب اتنين في الوقت ده لي كانوا دكاترة مصريين في نفس المستشفي ... واحد أصلا من المنصورة و التاني من عين شمس .... الاتنين أكبر مني سنا ... دكتور المنصورة في قمة البشاشة و الذوق .... على طول بيساعدني و بينصحني .... دكتور عين شمس ما يشوفنيش غير ما يكسر مجاديفي و يحبطني و يقعد يشتكي من كل كبيرة و صغيرة لحد ما بقيت أتجنب اني أقابله أو أكلمه

    المهم عديت ال-٣ شهور على خير و أنا و المدام أجتازنا الفترة الأختبارية بنجاح و ابتديت الدنيا تتظبط شوية

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:15 pm

    حتى هذا الجزء من تجربتي أبرز النقط التي أود أن أعيرها اهتماما هي

    - قرار الهجرة قرار شخصي بحت ... لابد أن يتخذه المرء وفقا لما يراه و القرار في حد ذاته قد يكون صحيحا و لكن ما يترتب عليه من تجارب قد تكلل بالنجاح أو بالفشل لا قدر الله

    - من الأفضل دائما استقصاء المعلومات و البحث عن الأمور بدلا من المجازفة .... كما أشرت سابقا أنا صادفت بعض التأخير في مشواري في كندا و جزء كبير من الأسباب ترجع لجهلي بطبيعة الأمور و ميل بعض من قابلتهم من المصريين إلي اخفاء الحقائق

    - أول فترة في الهجرة دائما ما تكون صعبة .... في جميع النواحي ... الصبر و الجلد و وجود شريكة حياه متفهمة و مساندة تسهل الأمور إلي حد بعيد

    - التأقلم مع الحياة الجديدة يتطلب وقتا كبيرا .... في بعض الأحيان العمر كله .....ليس المطلوب التصبغ الكامل بالشخصية الجديدة و لكن المطلوب هو التفهم و التأقلم مع الحفاظ على الدين أولا و الهوية ثانيا .... مسألة الهوية تلك قد يطول الحديث عنها مما لا يسمح به هذا المقال و لذلك سأتركها جانبا الآن

    بعد الفترة الأولانية الدنيا بقت أحسن كتير و الناس ابتدت تثق فيا في الشغل و ابتديت أعرف حاجات مهمة ... أقرب جامع ... جزار حلال ...بقال بيبيع جبنة رومي (كانت فارقة معايا قوي مش عارف ليه ) ...

    الغلطة بقى اني فوت ميعاد أول أمتحان و ديه أخرت مشواري حوالي ٦ شهور ....ال-MCCEE .... أو اختصارا ال-EE evaluating exam ....و ده أمتحان أولي يخضع له كل الأطباء المتخرجين خارج كندا و يعتبر أول خطوة في سكة المعادلة ... الأمتحان على هيئة MCQs .... ورقتين من ٩ إلي ٤ على ما أتذكر بينهما ساعة راحة .... الأمتحان في جميع مجالات الطب ....مصدر المذاكرة الأساسي Toronto Notes و الاهم حل الأسئلة .... فيه اسئلة موجودة على النت .... فيه اسئلة بتتباع في محلات التصوير اللي حوالين الجامعة (جامعة تورونتو ) .... و فيه اسئلة مع ناس.... و منهم أعضاء الجالية المصرية بس دول ايدك منهم و القبر..... مش حيدوك الاسئلة لغرض ما في نفوسهم.... ما علينا ..... نفس الكلام ده ينطبق على ال-MCCQ1 أو اختصارا ال-qualifying exam بس ده بقى بتحله على شاشة كمبيوتر و كل عدد معين من الأجابات بتدوس enter و ما بتقدرش ترجع لاجاباتك تاني

    الفرق الاساسي برضه إن ال-EE أمتحان للمغتربين و المهاجرين و دول منهم كتير مش مستعدين كفاية للامتحان فسهل نسبيا النجاح فيه أما ال-Q1 أمتحان لكل طلبة الطب في كندا .... و دول وحوش بجد ....أغلبهم داخل الطب بقرض محترم من البنك و متغرب أو متغربة عن أهلهم و ما عندهمش أي استعداد يضيعوا دقيقة من حياتهم .....ده سبب من أسباب إن ال-Q1 صعب النجاح فيه .... فيه ناس بتعدي من أول مرة ...مش مستحيل يعني بس العبد لله ما نجحش غير تاني مرة و ديه أخرتني سنة بحالها و التأخير ده كان بسبب الجهة المسئولة عن استيعاب الأطباء المهجرين ال-IMG المعروفة حاليا باسم CEHPEA

    و للحديث بقية باذن الرحمن

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:16 pm

    . المعادلة الكندية و "البورد " الكندي أصعب من أمثالهم الأمريكيين بل أصعب من أي بلد أخر .... لكنها ليست مستحيلة... و الدليل قصص نجاح المصريين و غير المصريين المتعددة .... في حالتي أنا ...استبعدت تماما الذهاب إلي الولايات المتحدة لاسباب متعددة يصعب شرحها تفصيلا و لكن اقتناعي الشخصي إن الحياة في كندا أفضل من الحياة في الولايات المتحدة ...أوضاع المعيشة و الرعاية الصحية و تربية الأطفال و الوضع السياسي و الثقافي و التفرقة الدينية و العنصرية أكاد أجزم أنها أفضل بمراحل في كندا عن الولايات المتحدة .... تلك قناعتي الشخصية و ليست ملزمة لاحد على الأطلاق بل بالعكس احترم كلية من يخالفني فيها و أعلم إستحالة اجماع البشر على شيء واحد أو رأي واحد ... و توجد مقولة هنا أؤمن بها تماما

    One man's dream is another man's nightmare

    في سبيل اقتناعي هذا لا أجد بأسا من الكدح و العمل الشاق حتى أصل إلي ما أريد .... بالبلدي مفيش حلاوة من غير نار و ما فيش حاجة بتيجي بلاش

    . من الممكن العمل كطبيب في إحدي المستشفيات الكندية في وظيفة " fellow" حتي الحصول على المعادلة ثم البورد .... تلك الوظيفة متاحة في بعض المستشفيات لبعض التخصصات و تخضع للتنافس بين الطلبات المقدمة ..... ما عليكم سوي البحث عنها كما فعلت أنا .... google مثلا Surgery+ fellowship + Toronto أو Orthopedics + fellowship+ Vancouver و هكذا
    لن تخسروا شيئا و تذكروا
    You miss 100 % of the shots you don't take

    وظيفة fellow تلك محدودة بعدد سنين معينة ( ٣ في أونتاريو ) و تختلف من مكان لاخر و من مستشفي لاخر .... كطبيب تخدير الوظيفة تلك كانت كافية جدا للصرف و الانفاق طول اقامتي في كندا .

    . المعادلة الكندية ٣ أجزاء ....أول خطوتين امتحانين MCQ أولا ال-MCCEE يليه ال-MCCQ1 و قد أشرت اليهما سابقا ..اسئلة الأمتحان موجودة على النت في موقع ال-MCC .ca ....الأسئلة التي أشرت إليها انها تباع في بعض المكتبات حول الجامعة موجودة كاوراق مطبوعة و يصل عددها للمئات ..الخطوة التالثة ال-MCCQ2 و هو أمتحان عملي و شفوي على مرضي تخيليين ...بمعني أن المريض في الواقع ممثل محترف لديه سيناريو محفوظ و محدد للرد و التصرف .... توجد العديد من البرامج و الهيئات التي تعد لهذا الأمتحان منها ما هو مجاني و منها ما هو بمقابل مادي

    . قبل الانتهاء من المعادلة يمكن التقدم إلي برنامج التنسيق للنيابات الكندية CaRMS ( بعد النجاح في ال-EE ) و لكن قد لا تحصل على التخصص المرجو و عليه تلك الطريقة أفضل للاطباء الشبان الذين لم يقطعوا شوطا كبيرا في مجال تخصصهم و لا يرغبون في تخصص بعينه

    . في حالتي أنا ... كنت مصمما على العمل في مجال تخصصي و كنت أري اني لا احتاج إلي أي تدريب أو خلافه و عليه تقدمت إلي ال-IMG (المعروفة الآن باسم CEHPEA) للعمل كاستشاري و الحصول على موافقة للتقدم مباشرة لامتحان الكلية الملكية و ارتكبت عدة أخطاء ستكون محور المشاركة القادمة باذن الرحمن

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:17 pm

    توقفت عند الفرص المناسبة للاطباء من شاكلتي ... استشاريين و اخصائيين ممن تقدم بهم العمر قليلا و اكتسبوا خبرات متراكمة

    في أونتاريو الطريق هو التقديم من خلال هيئة ال-IMG المعروفة حاليا باسم CEHPEA و لها موقع مفيد جدا على النت ..... بعد قبول طلب التقدم تعقد عدة امتحانات ما بين MCQ و شفوي و عملي بالاضافة إلي مقابلة شخصية

    بناء على نتيجة كل الامتحانات بالاضافة إلي خطابات تزكية (تفضل أن تكون من أطباء كنديين ) و ال-CV (وجود اقامة كندية أو جنسية كندية عامل مساعد مهم ) يتم توصيف المتقدم بواحد من أربعة حاليا ...غير لائق ...مستوى نائب سنة أولي .... مستوى نائب سنة ثانية ..... مستوي استشاري

    بناء على التقييم إما أن يحاول المتقدم مرة أخري (بعد سنة كاملة ) اذا كان غير لائق .... أو يلتحق ببرنامج نيابة داخل أونتاريو سنة أولي أو ثانية .... أو يلتحق بالعمل في مشتشفي خارج تورنتو و المدن الكبري مع اعطائه تصريح بدخول إمتحان الكلية الملكية لمستوى استشاري

    أنا ارتكبت عدة غلطات كانت كفيلة بتأخيري حتي الان و أحصرها في الآتي :

    ١- تأخرت في التقديم لامتحان ال-EE حتي فاتتني فرصة التقدم إلي ال-IMG أول سنة (دورة التقدم إلي ال-IMG مرة واحدة فقط كل سنة )

    النصيحة : التقديم باسرع ما يمكن و الحصول على ال-EE مبكرا ....الأفضل قبل القدوم إلي كندا ... خصوصا إن الامتحان يعقد خارج كندا في عدة بلاد

    ٢- السنة التالية زادت شروط التقديم و أصبحت تضم ضرورة النجاح في ال-Q1 .... لم يحالفني التوفيق في النجاح في هذا الامتحان أول مرة مما أخرني سنة أخري

    النصيحة : الأستعداد جيدا لهذا الامتحان لانه صعب بالفعل خصوصا لمن مضي على تخرجه السنين و السنين كما إن مشكلته الأساسية التنافس المباشر مع الطلبة الكنديين المستعدين جيدا له ... أيضا مهارة التعامل مع جهاز الكمبيوتر قد تكون مشكلة مع البعض .... الورقة الثانية من هذا الاختبار عبارة عن اسئلة قصيرة مما قد يشكل تحدي آخر

    ٣- مدفوعا بالتأخيرات السابقة و بعد النجاح في ال-Q1 قررت التقدم لمستوي الاستشاري فقط و استبعدت التقدم إلي مستوى نائب .... المنافسة كانت شرسة جدا .... من أصل حوالي أربعين متقدم ١٦ فقط اجتازوا الامتحان التحريري إلي الشفوى ... منهم ١٢ فقط (كنت واحد منهم ) تم دعوتهم إلي مقابلة شخصية ....٣ فقط تم قبولهم (لم أكن منهم ...و الحمد لله على كل حال )

    النصيحة .... المرونة و التواضع و التقديم في كافة المستويات لعل و عسي .... في الواقع القبول في برنامج النيابة قد يكون عسيرا على نفس من هم على شاكلتي و لكنه في الحقيقة يؤمن لك مكان داخل السيستم و يوفر لك فرصة أفضل لاجتياز إمتحان الكلية الملكية

    الحقيقة المرة أيضا أن شهاداتنا المحلية (العبد لله حاصل على الدكتوراه من القاهرة ) و خبراتنا لا تعني ابدا فرصة أفضل لك عن الاخرين فلا يغرك شيطان الكبر و التعالي و أعمل ما في وسعك

    ٤ - قدمت السنة الحالية في ال-CEHPEA لكافة المستويات كما قدمت في ال-CaRMS و في انتظار النتيجة النهائية إن شاء الله

    أنا تحت أمركم في أي إستفسار و المشاركة القادمة عن الحياة في كندا .... تورنتو تحديدا ... ما لها و ما عليها

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:19 pm

    اخي الفاضل د.هشام بارك الله فيك و الله يوفقك على هذه النصائح المفيده.ممكن خبرتك اكبر و لكن انا وضعي مشابه لدرجه ما لوضع حضرتك و ستكون مشكله في حال تغير الاختصاص لا سمحالله! يعني ال PhD مش راح نستفيد منها خالص هناك!!!!! ؟و مجال البحث العلي يغلق ؟ يعني لازم نعمل رساله دكتوراة من اول و جديد!!!؟ طيب اي امتحانات اللغه الانجليزه المطلوبه لوظيفه ال fellowship ؟ الله يوفقك و شكرا على مشاركتك و المعلومات التي تفيدنا بها.


    أخي الفاضل ...ال-PhD نقطة قوية في ال-CV لكن لا علاقة لها بالمعادلة الكندية أو التقدم لامتحان الكلية الملكية .... كثير من الفرص المتاحة للعمل ك "fellow" تسمح لك باجراء بحث علمي ... بل أكثر من هذا توجد فرص للعمل ك Research Fellow مما يسمح لك بالتفرغ للبحث العلمي ... لكن عادة ما يكون المقابل المادي أقل

    المشكلة إن العمل ك "fellow " بالرغم من مميزاته العديدة لكن لا علاقة له بسكة المعادلة أو البورد

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:20 pm

    انا مهندس معماري وزوجتي طبيبة (ممارس عام ولسه خريجة من 8شهور بس) وبنفكر جديا للهجرة لكندا و بالتحديد كيبك... لكن اللي مخوفنا هو موضوع ان معادلة الاطباء اللي سمعنا عنها انها صعبة جدا في كندا... احب اعرف راي حضرتك وتقييمك للموقف بالنسبة للدكاترة الحديثي التخرج . وانا شاكر جدا سعة صدرك واتمنى لك من كل قلبي التوفيق و النجاح .


    الله يخلي حضرتك يا باشمهندس و دعواتي بالتوفيق لحضرتك و الدكتورة إن شاء الله

    المعادلة صعبة لا شك في ذلك و لكن اعتقادي الشخصي انها تستاهل المحاولة .... طبعا القرار الأخير في يد حضرتك ... عن نفسي لم أكن أستطيع أن أواصل الحياة في مصر

    بالنسبة للدكتورة كون انها حديثة التخرج ميزة كبيرة ... أولا المعلومات لسه حاضرة في ذهنها .... لك أن تتخيل حضرتك اني خريج ١٩٩٥ بالنسبة لي امتحانات المعادلة كانت في منتهي الصعوبة لبعدها عن مجال تخصصي

    الميزة الأخري انها مش متقيدة بتخصص معين و عليه فرصها أكتر للاتحاق بنيابة ... بمعني أنا ما كانش قدامي إلا التخدير ... في حالتها المجالات كلها مفتوحة و لن يضيرها كثيرا أن تبدأ النيابة من الصفر اذا تطلبت الأمور

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:23 pm

    انا طالب سنة 3 طب وناوي ان شاء الله لما اخلص اهاجر واشتغل طبيب في كندا

    عاوز اعرف ممكن اعمل ايه من اول ما اخلص سنة 6 عشان ابقى طبيب ؟

    وهتتكلف كام تقريباً كده ؟

    وايه رايك في الزمالة البريطانية
    ممكن اشتغل بيها في كندا من غير معادلة ؟

    ويا ترى ايه التخصصات المطلوبة في كندا عشان نسستم نفسنا عليها من دلوقتي ( اخوك الصغير ناوي يبدا شغل كلينيكال واتفرج على حالات من الصيف الجاي ان شاء الله سواء بالواسطة عن طريق خالي مدير اكتر من مركز طبي عندنا في طنطا او في مستشفى الطوارئ )

    ويا ترى مرتبات الوظايف الطبية في كندا زي ال fellows و النايب والاستشاري

    وهل وظيفة الطبيب سهل كده احصل عليها ؟

    وانا سمعت ان فيه ولايات بتقبل دكاترة من غير معادلة

    الكلام ده صحيح ولا لأ


    واسف على الاطالة ومعلش احنا ما بنصدق نلاقي طبيب يرد على استفسارتنا

    وربنا يجعله في ميزان حسناتك



    بص يا دكتورنا ...

    ١- أول ما تخلص سنة سادسة و قبل ما تنسي المذاكرة تمتحن ال-MCCEE ... إن شاء الله ساعتها حتبقى في سنة الأمتياز و نسبيا فاضي ... بالنسبة للتكلفة أنا امتحنت الأمتحان من أكتر من سنتين و إنت لسه قدامك ٣ أو ٤ سنين ... وقتها يا عالم التكلفة حتبقي كام ...

    ٢- بالنسبة للزمالة البريطانية ... يمكن تقصر سكتك شوية في المعادلة و الدخول في السيستم بس لازم برضه تمتحن المعادلة .... رأيي الشخصي لو ابتديت سكة بريطانيا كمل فيها و ما تشتتش مجهودك

    ٣- أكتر تخصص مطلوب في كندا هو طب الأسرة (family medicine) ... انما فيه تخصصات مطلوبة برضه كتير ... التخدير مطلوب في الدنيا كلها مش بس كندا

    ٤- مرتبات الوظائف مختلفة جدا من مقاطعة للتانية و من مستشفي للتانية و من تخصص للتاني و بتتراوح من صفر زي fellowship عظم في تورنتو ( ما فيش مرتب خالص ... بيعتبروها فترة تدريبية تعليمية ) لاكتر من ١٠٠ ألف دولار في السنة ... fellowship عناية مركزه

    ٥- الحقيقة يا أخي الفاضل ما فيش حاجة في الدنيا ديه ليها قيمة بتبقى سهلة ... كل حاجة لازم نتعب علشانها و نكافح و ندفع تمنها من الجهد و الوقت و الفلوس ... و طبعا أولا و أخيرا توفيق ربنا

    ٦- على حد علمي ما فيش مقاطعة تنفع تكمل فيها من غير معادلة ... انما في مقاطعات زاي Newfoundland الطريق فيها أسهل لحاجتهم الشديدة للاطباء

    ربنا يوفقك للخير إن شاء الله

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:25 pm

    تورنتو مدينة عجيبة و متميزة جدا ... يمكن أهم ما يميز تورنتو انها مش بتاعة حد ...الحكاية ديه بتفرق مع المهاجر الجديد قوي ..... يعني تمشي في شينا تاون تقول ديه حتة من الصين و أهلها كلهم بلديات شنجهاي ربع ساعة ماشي تلاقي نفسك في الحي الكوري .... نهائي كاس العالم بين ايطاليا و البرتغال تقول المشجعين اللي موجودين في الحي الايطالي و البرتغالي دول مستوردين رأسا من روما و لشبونة ....و هكذا .... تمشي في شارع لورنس في سكاربورو تضرب سندوتش شاورمة شامي و تشتري بقالتك من محل البقالة العربي .... عسل أسود و طحينة حلواني و عصير بست .....و اللي غاوي ممكن يقعد على أي قهوة يشرب شيشة ....
    لو تسمع الناس اللي في الشارع بيتكلموا قليل ما تلاقي حد بيتكلم انجليزي كله بيتكلم لغته .... تركب تاكسي لو السواق مش من شبه القارة الهندية أنا شخصيا باقلق

    التوليفة ديه موجودة في نيويورك بس تورنتو أهدي و انضف و آمن ( معدلات الجريمة في تورنتو في ارتفاع للاسف بس ما زالت آمنة إلي حد كبير و لا تقارن مثلا لا بنيويورك و لا القاهرة )


    أظرف حاجة إن كتير من الأفلام الامريكاني بتتصور في تورنتو على انها نيويورك .... طبعا بيغيروا نمر العربيات اللي في المشهد و يجيبوا كام صندوق بريد عليه علامة نيويورك و يرموا على الأرض شوية زبالة محترمين علشان تبان انها نيويورك

    تورنتو في الحقيقة بتتكون من كذا مدينة ... زي القاهرة الكبري كده ما هي قاهرة و جيزة و قليوبية (و دلوقتي كمان ٦ أكتوبر و حلوان ) .... تورنتو بتتكون من أربع أقسام كبار ...Peel و York و Durham و Halton كل واحدة من دول بتنقسم لمدن صغيرة زي سكاربورو و ميسيسوجا و إتوبيكو و أوكفيل و نورث يورك و تورونتو نفسها اللي بنقول عليها وسط البلد


    عدل سابقا من قبل Dr.H في الثلاثاء فبراير 16, 2010 10:28 pm عدل 1 مرات

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:27 pm

    الحياة في تورنتو سهلة إلي حد كبير بمعني أن الخدمات متوفرة و على مستوى من جيد إلي جيد جدا إلي ممتاز .... في رأيي الشخصي الأهم على الاطلاق هما التعليم و الصحة .... ميزة كبيرة من مزايا كندا إن التعليم و الصحة على أعلي مستوى و الخدمة مجانية تماما

    و تفصيلا مثلا خدمة البريد ممتازة و تستطيع أن تعتمد عليها تماما في ايصال أي مستندات إلي أي مكان في العالم و في وقت معلوم .....المواصلات متوفرة و رخيصة إلي حد كبير و لو إن شبكة مترو الأنفاق تحتاج إلي تطوير ..... طبعا أنا لا أقارن بالقاهرة حتى لا أظلمها .... أنا أقارن بين تورونتو و المدن التي زرتها باريس ... طوكيو .... برلين .... مونتريال ..... إلخ

    خدمات الشرطة و الأسعاف و المطافي على أعلي مستوى ....

    أنا شخصيا تعرضت لتجربة مريرة كدت أن افقد فيها شريكة حياتي بعد أزمة صحية عنيفة لولا فضل الله و سرعة استجابة الأسعاف ... عندما اتصلت ب-٩١١ (زي ١٢٢ عندنا كده ) كان المسعفين داخل شقتي بعد أقل من دقيقيتين و ذهبنا إلي المستشفي في أقل من ١٠ دقائق .... لكم أن تتخيلوا امتناني و تقديري خصوصا اني كنت في حالة لا يعلمها إلا الله و نسيت تماما اني طبيب و فقدت القدرة على التصرف أو التفكير رغم تعرضي لهذا الموقف كطبيب بصورة متكررة و كم انقذت أرواح باذن الله و فضله قبل هذه المحنة

    المطافي لا تتواني علي الذهاب فورا لأي بلاغ أو انذار حريق .... دأب بعض قاطني العقار الذي أسكن فيه على قلي بطاطس في أوقات غريبة ليلا و نهارا .... و في كل مرة عندما يزيد الدخان داخل شقتهم يفتحوا باب الشقة لتنطلق صفارات الأنذار في ارجاء العمارة كلها (٢٧ دور .... كل دور ٢٠ شقة ) و لم تتقاعس المطافي مرة عن المجيء .... و في زمن قياسي للتحقق من الأنذار حتي يكتشفوا إنه انذار كاذب و يعودوا من حيث أتوا

    الشرطة شعارها To serve and protect و هو شعار على حق ... أفراد الشرطة في غاية الأحترام مع الجميع و لكنهم و في غاية الصرامة مع الخارجين على القانون حتي لو كانت مخالفة مرورية .... بالطبع المخالفات البسيطة يتغاضوا عنها .... مثلا كنت مرة أقود سيارة مأجرة في احدي ضواحي تورنتو و لم انتبه إن السرعة القصوي في الطريق كانت ٦٠ كم / ساعة .... تعديت السرعة المقررة (كنت لسه طالع من طريق سريع و ماشي على ٨٤ كم /س ) عندما انشقت الأرض على عربية دورية خلفي ... طبعا في هذه الحالة يجب أن أقف تماما على جانب الطريق و لا اتحرك من السيارة .... يقوم الشرطي بالكشف على نمرة السيارة بالكمبيوتر الموجود في سيارته ثم يتوجه إليك....في حالتي دار هذا الحديث بالانجليزية طبعا
    - مساء الخير سيدي هكذا تحدث ...
    - رديت عليه مساء الخير أيها السيد الظابط هل تعديت السرعة المقررة ...
    - نعم كانت سرعتك ٨٤ كم / س في طريق ٦٠ .....
    - أسف جدا لم انتبه إلي اللافتة .....
    - هل هذه سيارتك (هو يعلم تماما مكنون السيارة كلها )
    - لا يا سيدي هي سيارة مؤجرة من هيرتز ....
    - أوراق السيارة و التأمين و رخصتك من فضلك .....
    أخذهم ثم ذهب إلي سيارته للكشف عليهم و عاد بعد عدة دقائق .... حسنا لا يوجد لك مخالفات سابقة سوي مخالفة ركن في الممنوع ( حقيقة ....مهاجر مصري بقى حنعمل إيه ) و لكنك كنت مسرعا اليوم، أنا أريد مساعدتك و لذلك ساقيد المخالفة علي إن سرعتك ٦٤ كم /س حتي لا تتعرض لخصم نقاط من رصيدك و مخالفة كبيرة ....أنا أسف جدا (الظابط يتأسف لي ؟!!!)
    - لا داعي للاسف يا حضرة الظابط أنا شاكر لك جدا و ممتن لك حقا ....Have a nice day
    - Same to you

    و للحديث بقية إن شاء الله

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:30 pm

    التعليم الحكومي من أفضل ما يمكن و كمان فيه مدارس خاصة بس باهظة الزمن و ملهاش لازمة في رأيي .... المشكلة تكمن في التربية مش التعليم .... طبعا احنا كشرقيين مسلمين أو مسيحيين معتقداتنا و تقاليدنا قد تصطدم (الحقيقة مش قد هي فعلا حتصطدم ) مع القيم الغربية و ديه يمكن أكبر مشكلة ممكن تواجه المهاجر مع عائلته
    الحل في أيدينا .... مجهود مضاعف لا يكل و لا يمل و تركيز دائم على التربية الدينية الصحيحة ... الحقيقة برضه الكلام ده بقى لازم جدا في الزمن ده سواء كنا في كندا أو في مصر أو في الخليج .... الدنيا دلوقتي صعبة جدا و المغريات كتيرة و طرق الانحراف متعددة في أي مكان في العالم .... المراكز الأسلامية موجودة و فعالة جدا في تورنتو .... تحفيظ قرأن و دروس لغة عربية و دروس سيرة إلخ ..... حنتعب شوية آه .... بس حق ولادنا علينا إن احنا نوفر لهم وطن يحترم ادميتهم و يصون صحتهم .... بلد فيها تعليم و رعاية صحية و ديمقراطية ... بلد ما أضطرش فيها اني أكذب أو ارشي أو أعمل حاجة تخالف ضميري علشان لقمة العيش .... حكاية العادات و التقاليد ديه فيه منها مفيد و فيه منها مضر ..... الأهم الدين و أعتقد اني كده كده لازم نبذل مجهود مضاعف للحفاظ عليه وسط المغريات العديدة الموجودة دلوقت سواء كانوا في كندا أو في مصر

    مثال ناس مصريين إتعرفنا عليهم هنا .... الأب و الأم مهندسين و قاعدين في ميسيسوجا مهاجرين من أكتر من ٣٠ سنة و ليهم أبن و أبنة موليدين هنا ....الأم قعدت من الشغل بعد كل ولادة ٥ سنين علشان تاخد بالها من الاطفال و إيه اللي بيشوفوه و بيتعلموه .... دروس قرآن أسبوعية و دروس لغة عربية و دروس اضافية في البيت كمان .... النتيجة ولاد زي الفل عارفين ربنا كويس قوي و صلاة و صوم و التزام .... الهدف من القصة ديه مش إن كل الولاد حيطلعوا كده لأ ...الهدف إن الوالدين عليهم مسئولية كبيرة جدا خاصة في العصر الحالي

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:30 pm

    نيجي للصحة .... الرعاية الصحية في كندا من أفضل ما يكون و مجانية لكن المشكلة في تأخير تقديم بعض الخدمات الغير طارئة .... يعني مثلا أنا حكيتلكم على الموقف بتاع عربية الأسعاف ده ....الحالات الطارئة ما فيهاش هزار و لها الأولوية انما الحالات غير الطارئة ممكن يبقى فيها تأخير .... مثلا عملية تغيير مفصل ممكن تتأخر ٦ شهور لأن العملية بالدور ( ما تنسوش انها مجانية ) علشان تاخد ميعاد من دكتور العائلة علشان الكشف الدوري السنوي ممكن تتأخر كام أسبوع .... لو رجلك أتجزعت و رحت الطوارئ ممكن تقعد ٣ ٤ ساعات علي بال ما حد يشوفك .... الحال ده ممكن ما يعجبش ناس و ممكن يعجب ناس .... أنا عن نفسي شايف إن نظام الرعاية الصحية الشامل المجاني ما ينفعش يبقى احسن من كده و لو إن الحكومة الكندية مش موافقة على الكلام ده و بتحاول تحسن الخدمة و تقصر قوائم الأنتظار

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:31 pm

    نيجي للطقس .... كندا برد ما فيش كلام .... لكن تورنتو من أحسن الأماكن في كندا جوا .... فانكوفر درجات الحرارة فيها أحسن من تورنتو صيفا و شتاء انما مطر مستمر و الشمس بتطلع قليل أصلا .... اصدقاء فاضلين لي من لبنان طلعوا من تورونتو لفانكوفر و ما قدروش يستحملوا هناك و راجعين تورنتو إن شاء الله على أول السنة

    جو تورنتو مميز جدا .... فاكرين كتب الأطفال المصورة عن الفصول أو أوبريت الربيع بتاع فريد الأطرش

    الربيع بديع و درجات حرارة معتدلة و الشجر اللي كان عاري تماما من الورق في الشتا و شكله مات خالص بامر الله سبحانه يرجع يتغطي كاملا تاني و الورود و الأزهار تفتح في كل حتة

    الصيف حار و رطوبة و الشمس ساطعة و الناس مخففين الهدوم و طالعين على الشواطئ أو الكورنيش ساعة العصاري و المغرب

    الخريف بارد نوعا و الشجر بيغير ألوان ورقه لاصفر و أحمر و بني و على أخر الخريف الورق كله يقع على الارض و يبقي لعبة للرياح تاخده و تجيبه

    البرد قارص و تلج و جليد ... الحرارة ممكن تنزل لناقص أربعين بس العادي بيبقى ناقص ١٥ أو عشرين بال-windcill

    ديه حاجة تانية حبتها في كندا .... الحرارة بتتقال قيمة و احساس .... مثلا في مصر يقولوا الحرارة ٣٥ تنزل الشارع تقول مش ممكن تكون ٣٥ ديه مش أقل من ٤٥ ....٣٥ ديه بتتاخد في مطار القاهرة باين تحت ظروف جوية معينة انما احساس الناس في ميدان العتبة مثلا لا علاقة له بالحرارة ديه .... رطوبة و رياح و عوامل تانية بترسي على حرارة معينة ..... في الصيف الدرجة بتتقاس بال-Humidex و في الشتا بال Wind chill

    الحقيقة برضه إن الدنيا هنا مصممة لجو الشتا و الحكومة ما بتكلش عن الخدمة ..... الدنيا كلها هنا مكيفة تكييف مركزي و حياه ال-Indoors قوية جدا لدرجة انك لو عايز ممكن ما تخرجش الشارع أصلا في الشتا و لو خرجت يبقى لاقل وقت ممكن ..... طبعا لبس الشتا لازم يكون محترم جدا و عازل للحرارة تماما ..... طبعا أستحمال الحرارة بيختلف من شخص لاخر ....يعني أنا استحمل البرد احسن كتير من الحر و الرطوبة .... غيري مش كده و لله في خلقه شئون

    الحاجة التانية بالذات في تورنتو البلدية ما بتونش في الشتا كاسحات الجليد شغالة الله ينور .... التلج بيتشال باسرع ما يمكن .... الطرق و الكباري اللي بتتبهدل جامد من الملح و الجليد كل شوية يرصفوهم مرارا و تكرارا .... مصل الأنفلونزا ببلاش في كل حتة للي عايز .... تحذيرات الأرصاد الجوية بتتغير كذا مرة في اليوم .... يعني لو توقعوا الحرارة تبقى ١٥ و حصلت حاجة تخلي التوقع يتغير و يبقى ١٤ حتشوفه قدامك في التلفزيون و تسمعه في الراديو و تقراه على النت

    Dr.H

    عدد المساهمات: 112
    تاريخ التسجيل: 11/02/2010

    رد: قصتي مع كندا, تجربة شخصية

    مُساهمة  Dr.H في الثلاثاء فبراير 16, 2010 10:33 pm

    أحتاج مساعدتك و مساعدة جميع الاخوة ذوو الخبرة و العلاقات فى كندا هل يتطلب العمل فى شركات الادوية فى كندا المعادلة مع اعتبار اننى طبيبة وأعمل فى فروع شركات أدوية أمريكية فى مصر و الخليج لمدة تزيد على 14 عاما وما هى فرص العمل فى كندا وهل يؤثر حجابى فى ايجاد فرصة عمل فى كندا و لك جزيل الشكر على مساعدتك و الاخوة الكرام مقدما


    زميلتي الفاضلة ... الشكر و العرفان لحضراتكم جميعا على كلمات المديح و الدعوات الطيبة ... علي حد علمي يمكنك العمل بشركات الأدوية بدون المعادلة و لكن طبيعة الوظيفة قد لا تكون لائقة بك لمدة طويلة ....قد تصلح لمدة مؤقتة حتي تستقر أمورك ... و لكن لا تصلح وظيفة دائمة للمستقبل ....

    المعادلة صعبة لا شك في هذا و لكنها ليست مستحيلة و هي الطريق الصحيح للاستمرار في كندا و الوصول إلي مكانة مرموقة باذن الرحمن

    أما على الحجاب فلا تأثير إطلاقا منه على الاقل في أونتاريو ... كما ذكرت سابقا خبرتي كلها في العمل كانت في تورنتو حتي الآن ... في جميع المستشفيات التي عملت أنا أو زوجتي بها كان يوجد محجبات و لم أسمع بأي مضايقة من أي نوع في أي مستشفي .... قد يطلب منك تغيير الطرحة أو الايشارب اذا ما تعاملت مع مريض بمرض معدي أو اذا ما طلب منك الدخول إلي منطقة معقمة كالعمليات مثلا لكن لا تأثير لحجابك على اختيارك لوظيفة ما ....

    احقاقا للحق سمعت أن كيوبيك حدثت فيها بعض المشاكل المتعلقة بالحجاب في أماكن العمل و الدراسة على شاكلة مشاكل فرنسا و لكن ليست لدي التفاصيل كاملة

      الوقت/التاريخ الآن هو الخميس أبريل 17, 2014 5:00 am