الطريق الي كندا

كل ما تريد معرفته


    معلومات عامة عن البرتا

    شاطر

    The Boss

    عدد المساهمات : 44
    تاريخ التسجيل : 11/02/2010
    العمر : 35

    معلومات عامة عن البرتا

    مُساهمة  The Boss في الأحد فبراير 14, 2010 10:22 am

    بقلم حسيني

    السلام عليكم يا حبايبي المطاريد

    نزولا علي رغبة الجماهير هنبدأ ان شاء الله الباب الجديد ده لمقاطعة البرتا "بير بترول كندا".......طيب اشمعنا عملنالها باب لوحدها؟؟؟

    بحكم اني شايف ان فيه تشابه كبير بين الخليج و كندا و الغرب عامة في بعض الاشياء و الماديات و المعيشة المنظمة و توزيع المرتبات بالنسبة للوظائف و القطاعات....و بحكم اني شغال في السعودية بقالي كام سنة اهو و عمال بتنطط فيها من شرقها لغربها...........البلاد دي قايمة اساسا علي البترول و سبب الدخل العالي لاي وظيفة فيها فيها هو البترول و كل ما كانت شغلتك اللي انت شغالها قريبة من مجال البترول او داعما له بتلاقي المرتبات تضاعفت و نطت.......طيب يبقي الواحد يدور علي بلد فيها بترول......وقد كان....... و بشوية قراية عرفت ان جزء كبير من دخل كندا من البترول وان الفلوس اللي بتطلع من البرتا بتتوزع علي باقي المقاطعات التي لا موارد لها
    مع اني وقت ما سمعت عن كندا مكنتش اعرف و لا اسمع غير عن تورنتو...وهي تستاهل ان الواحد يعيش فيها لانها اكبر مدينة هناك بس لو معاك فلوس و مأمن شغلانه كويسه بمرتب محترم و استقرار....بس طبعا بحكم اننا كلنا لسه جداد علي البلد دي و خايفين علي القرشين اللي جايبينهم معانا من الخليج و ملناش اي فرصة غير للشغل المتواضع في البداية .....يبقي لازم نركز علي رفع نسبة نجاحنا في كندا من خلال اختيار اماكن مناسبة لايجاد فرص عمل حتي لو لم تكن الافضل علي الاطلاق
    وفي يوم قابلت مهندس عجوز معاه الجنسية و كان شغال وساكن في كالجري و ده اول سمع ليا عن البلد دي و انها في كندا اساسا....سألته قالي دي بلد جميلة و ضغيره بالنسبة لتورونتو بس مشكلتها انها ابرد شويه.....وعدت سنين بعدها ماسمعتش عنها اي حاجة......ومن سنه كده اتعرفت علي واحد تاني معاه الجنسية و كان عايش في تورونتو.......وفي وسط كلامنا قالي ان فيه بلد الناس اللي بتفشل في تورونتو بتهرب ليها عشان فرص الشغل فيها احسن و المرتبات اعلي بكتير....وهوا ليه اكتر من صديق هربوا علي هناك و كان بيقولي ان مرتب جرسون في مطعم هناك حوالي 20 دولار في الساعه يعني تقريبا مثل مرتب المهندس الجديد في تورونتو بعد ما يبقي مهندس نقابي و بعد المعادلة و الدوشة اللي احنا عارفينها دي.....
    اوم ايه كبرت في دماغي.....انا مش بحب افشل و لا بحب اعمل زي باقي الناس و خلاص.....طيب مانا اختصر الطريق وانزل علي طول علي البرتا بدل ماضيع القرشين بتوع الخليج دول في المخاطرة بتاعة تورونتو و يا عالم هانجح و لا هافشل.......وبالفعل بدأت اخد القرار علي كده و بدأت اجمع معلومات عن المقاطعة دي و عن المدن الكبيرة اللي فيها و لقيت اكبر و اشهر مدينتين فيها....الاولي: ادمينتون و هي العاصمة تقع شمالا شويه و من اكبر المدن الكندية و بيقولوا اهلها ودوديين و فيها فرص شغل كويسه
    و التانيه: مدينة كالجري و هي في جنوب ادمينتون و هي اكبر و فيها حيوية اكتر و حركة و قريت كلمة في موقع انجليزي بس مش فاهمها قوي انها العاصمة الادارية لالبرتا....المهم ناس قعدت تقولي دي و ناس تانيه تقولي دي و الاتنين كويسين مع بعض فروق صغيرة في الاسعار بينهما.....المهم انا بعد قرائتي شويه في النت من المواقع الكندية حبيت كالجري و حسيت انها انشط شويه....و اخترتها لانها قريبة من مدينة بانف و هي مدينة صغيرة سياحية في شوية مناظر من بتوع الجنة و لو عايز تتفرج اعمل سيرش هتلاقي مناظر كتير ليها و فيه موقع كمان للمنتجع ده و فيه صور تمام....اسمه بالانجليزي Banff
    طبعا بردو ربنا محرمش ادمينتون من الموضوع ده.....هنا منتجع سياحي جبلي جنبها بردو فيه سياحة الثلوج و التزلق و مناظر طبيعية تحفة بردو بس مش زي بانف
    طيب ايه بقي مميزات العيشة في البلد دي عن تورونتو؟؟؟
    اولا: هتلاقي شغل بسهولة و مرتبات كويسه نظرا للعجز الرهيب في الايدي العاملة فيها حتي انها مفتوحة للهجرة الترشيحية من خلال المقاطعات "provincial nomination" بس طبعا مش لينا .....بس العيشة هناك غالية......وكمان السكن اغلي......صح....بس بمعادله بسيطة انك لو قدرت تستغني عن بعض الكماليات في حياتك هتلاقي المرتب ده ممتاز للعيشة احسن من اللي ممكن تاخده و تشيله في تورونتو ده لو لقيت شغل غير الحراسة و الحجات اللي زيها في تورونتو ......امال انا هاشتغل ايه في البرتا.....هاقولك ان حضرتك غالبا هتشتغل شغلتك بتاعة مصر من غير معادلة ولا يحزنون بس الموضوع انك مش هتمضي علي حاجة و مش هتبقي شايل مسئوليات المهندس النقابي مثلا لو انت مهندس.......بس طبعا مرتبك مش هيبقي زي مرتب المهندس النقابي .......بس طبعا دي حاجه ممتازة و كفيلة برفع روحك المعنوية كثيرا في الاول حتي لو المرتب مش قد كده بس حسيت انك لسه مهندس او مبرمج او غيره...يعني لسه بكرامتك......نسبيا لحد ما تعمل المعادلة و اللي هيا بالمناسبة اسهل من تورونتو في معظم المجالات.

    ثانيا:البرتا (كالجري و ادمينتون) من اكثر المدن الكندية عرضة للشمس يعني نصيبها كبير من الشمس و عدد ساعتها علي مدار العام رغم برودتها...مش بس كده فيه رياح بتيجي عليها في عز الشتا مش فاكر اسمها بالضبط بس تقريبا الشينوك حاجه زي كدا دي بتقلل درجة الحرارة في يوم و ليلة من 20 تحت الصفر الي 5 فوق الصفر مثلا....يعني تصحا الصبح تلاقي مفيش تلج و الدنيا حلوه و دافيه....سبحان الله

    ثالثا: البلد اصغر من تورونتو بكتير وبالتالي اهدا و اامن ....

    رابعا: الضرائب فيها اقل وكمان فيها مصريين وعرب كتير

    طبعا الموضوع من وجهة نظري و كل واحد ممكن يشوف شئ اخر انسب ليه حسب طبيعة عملة و ميوله الشخصية.....زي اخويا سامح سعد.....هوا شايف ان انسبله ينزل تورونتو لانه شغله متعلق و متوفر و ليه فرص هناك احسن من البرتا.......في الاخر الموضوع يرجعلك انت مش حد تاني

    نبتدي بسم الله الرحمن الرحيم

    The Boss

    عدد المساهمات : 44
    تاريخ التسجيل : 11/02/2010
    العمر : 35

    رد: معلومات عامة عن البرتا

    مُساهمة  The Boss في الأحد فبراير 14, 2010 10:23 am

    http://www.cicnews.com/2008/06/alber...job-06658.html

    http://www.cicnews.com/2008/05/h1b-a...red-05652.html

    شوفي اللينكات دي...بتقول انه مش شرط عقد عمل

    The Boss

    عدد المساهمات : 44
    تاريخ التسجيل : 11/02/2010
    العمر : 35

    رد: معلومات عامة عن البرتا

    مُساهمة  The Boss في الأحد فبراير 14, 2010 10:27 am

    اقتباس:
    المشاركة الأصلية كتبت بواسطة hosiny
    طيب ايه بقي مميزات العيشة في البلد دي عن تورونتو؟؟؟

    اقتباس:
    المشاركة الأصلية كتبت بواسطة hosiny
    اولا: هتلاقي شغل بسهولة و مرتبات كويسه نظرا للعجز الرهيب في الايدي العاملة فيها حتي انها مفتوحة للهجرة الترشيحية من خلال المقاطعات "provincial nomination"

    من الملاحظ فعلا في اماكن كثيرة يافطة "now hiring" و لكن ذلك بالنسبة للاعمال البسيطة.لكن طبعا لو بنتكلم عن اعمال متخصصة طبيب مهندس ...ده محتاج شوية بحث.
    والشئ المطمئن في رحلة البحث عن العمل ا ن عادة عندما تقدم لاعلان عمل -لو من على موقع نت زي Workopolis مثلا -انت تقدم في الحقيقة لrecruiter و يكون هو الوسيط مع الشركة التي ستعمل بهابعد ذلك.و من صلحته طبعا ان يحصل لك على اعلى اجر حتى ياخذ اعلى نسبة من صاحب الشركة (و ليس منك انت). كمان لو حصل و لم توفق في اول فرصة عمل هو بيكون لديه ملف خاص بك خلاص و يبحث لك عن اللي بعدها.المهم في ذلك انك طبعا يكون عندك سى في محترم و انك تظهر جديتك مع هذا الrecruiter و تتابع معاه و تساله حتى يتاكد هو من جديتك و انك ستكون حالة كسبانة بالنسبة له.(ده بالنسبة لمجال الهندسة و الايتي و الhuman resources ا كيد , و مثلا في معظم الشركات الخاصة, و ايضا قطاعات الحكومة هنا في البرتا يتم جزء كبير من خلال الrecruiter , و لكن بالنسبة لمؤسسات اخرى -زي مثلا وزارة الهجرة و اللجوء و يمكن عشان مقاييس الامن فيها اعلى - يكون التقدم للعمل مباشرة معهم و ليس من خلال احد)


    اقتباس:
    .....بس العيشة هناك غالية......وكمان السكن اغلي......صح....بس بمعادله بسيطة انك لو قدرت تستغني عن بعض الكماليات في حياتك هتلاقي المرتب ده ممتاز للعيشة احسن من اللي ممكن تاخده و تشيله في تورونتو


    لااعلم بالضبط بالمقارنة باونتاريو او كيبك,,,بس مثلا بالارقام على طول : الشقة الصغيرة (حجرة نوم صالة حمام مخزن مطبخ و بلكونة) في البرتا-ادمنتون المنطقة على بعد3٠ دقيقة من الdowntown حوالي 850 او 950 دولار شهريا. لو كندو في نفس المنطقة (كوندو:شقة مستواها افضل لانها عادة تؤجر من شخص و ليست شركة ,المحيط بتاعها اجمل و انظف ,فيهاعادة باركينج تحت الارض و الappliances داخل المنزل اكثر:بوتاجاز مايكرويف ثلاجة غسالة دراير-حجرتين و صالة و حمامين و مخزنين و دراسينج صغيرو بلكونة) دي حوالي الى 1300٠. اعتقد فعلا ان السكن ده اغلى من مثيله في مونتريال .


    اقتباس:
    ......امال انا هاشتغل ايه في البرتا.....هاقولك ان حضرتك غالبا هتشتغل شغلتك بتاعة مصر من غير معادلة ولا يحزنون بس الموضوع انك مش هتمضي علي حاجة و مش هتبقي شايل مسئوليات المهندس النقابي مثلا لو انت مهندس.......بس طبعا مرتبك مش هيبقي زي مرتب المهندس النقابي .......



    بالنسبة للمهندس و عن تجربة شخصية و رغم اني كنت كسولة فعلا في البحث عن عمل الا انه جائتني كذا فرصة اول ما وصلت بدون ان احتاج للمعادلة وحتى التسجيل بالنقابة.و المرتب طبعا اقل مش بس بسبب النقابة و لكن ايضا بسبب عدم وجود خبرة كندي.


    اقتباس:
    ثانيا:البرتا (كالجري و ادمينتون) من اكثر المدن الكندية عرضة للشمس يعني نصيبها كبير من الشمس و عدد ساعتها علي مدار العام رغم برودتها...مش بس كده


    هو التعرض للشمس لا يعني بالضرورة الدفء, الشمس موجودة هنا في الشتاء و الحرارة -٣٠في الهواء.
    كما ان الشمس على مدار اليوم في الصيف تضايق و خاصة لو في رمضان حيث كان الفجر حوالي في اثالثة والمغرب الثامنة و النصف مساء. و قبل كده في الصيف اكثر كان المغرب الساعة ١٠!!
    و في الشتاء حاليا النهار قصير جدا الفجر الساعة ٧ صباحا و المغرب الساعة 4.


    اقتباس:
    فيه رياح بتيجي عليها في عز الشتا مش فاكر اسمها بالضبط بس تقريبا الشينوك حاجه زي كدا دي بتقلل درجة الحرارة في يوم و ليلة من 20 تحت الصفر الي 5 فوق الصفر مثلا....يعني تصحا الصبح تلاقي مفيش تلج و الدنيا حلوه و دافيه....سبحان الله


    متهيالي الرياح دي في كالجاري و ليست ادمنتون و هي بالفعل ادفى قليلا من الاخيرة. بالنسبة لموضوع الثلج لما بيسيح :الثلج في الحقيقة يمتص جزء منالبرودة لذا هو نزوله مشمعناه ان هذاابرد حاجة. بالعكس المشكلة اكثر من الرياح و دي سبب البرد و ليس الثلج.لذا عندما تقرا الحرارة تقراء الدرجة في الwindchill عشان ده المؤشر الصادق: من٤ اسابيع كده كانت الحرارة حوالي -20 و لكن المهم كانت الwindchill -٣٥.



    اقتباس:
    ثالثا: البلد اصغر من تورونتو بكتير وبالتالي اهدا و اامن ....


    بالنسبة لادمنتون هي اكيد صغر من تورتنو واهدا لكن مش مؤكد موضوع اامن , دي محتاجةاحصائيات. و لكن اكيد بالنسبة للخروج و السياحة هياكيد اقل من تورتنو و كالجاري و خاصة في الشتاء.


    اقتباس:
    رابعا: الضرائب فيها اقل وكمان فيها مصريين وعرب كتير

    اكبر جالية من العرب هنا في ادمنتون هي الجالية اللبنانية و ده من خلال ملاحظتي الشخصية و ليست احصائية و هي بالمناسبة انشط جالية ايضا. و المحل العربي الوحيد الذي يبيع الاكل العربي و الحلال هو لبناني. اعتقد في تورنتو هناك كثير من محل عربي و ليس واحد. هنا مدرسة وحيدة اسلامية في ادمنتون و لكنها اكبر مدرسة اسلامية حجما في شمال امريكا كلها. و الجالية العربية هنا عامة ليست في مثل نشاط و حضور جالية تورنتو, و التي ادى حضورها الطاغي مثلا الى حشد الاف للمؤتمر الاسلامي السنوي الذي يعقد هناك و يقصده الشيوخ منالمشرق و المغرب.

    المهاجر

    عدد المساهمات : 7
    تاريخ التسجيل : 12/03/2010

    يا رجالة مصر

    مُساهمة  المهاجر في الثلاثاء مايو 11, 2010 8:22 am

    انا طبيب مقيم حاليا في الخليج ايه انسب الاماكن ليه ؟ واسرع فرص عمل ؟ افيدونا ؟ واحسن طلب هجرة ولا طلب فيزة عمل وشكرا

    marwa

    عدد المساهمات : 1
    تاريخ التسجيل : 27/06/2011

    استفسار

    مُساهمة  marwa في الثلاثاء يونيو 28, 2011 4:26 am

    سيدي العزيز.. انا فقط اتساءل اللي انا اعرفه ان البرتا فرص العمل بها كتير علشان البرد فيها قوي جدا جدا .. هل هذا صحيح؟؟ بالنسبة اني لم اسافر بعد و لكن لدي طفلان 5,8 سنوات هل يستطسعوا تحمل هذا الجو القارس؟؟؟؟؟

      الوقت/التاريخ الآن هو الأحد ديسمبر 04, 2016 7:25 pm